← Back to Index Go to diplomatic →

La panthere d’amors

Edition type: critical | Status: near-complete | Starting folio: 153v

In the critical edition, punctuation has not yet been modernised and line breaks have not yet been standardised.

Folio 153v
1 A dame bele et bone et sage
2 Noble de cuer et de lignage
3 Cilz qui son dous non volt escrire
4 Que par ce ne puist de mesdire
5 Aus mesdisans ouvrir la voie
6 En lieu de salu li envoie
7 Son cuer et toute sa pensee
8 Avec ceste oevre que rimee
9 A pour li especiaument
10 Mais comment que principaument
11 L'ait por li faite et acomplie
12 Toute voies ne l'ose mie
13 Droitement a lui enuoier
14 Car il ne veult pas auoier
15 Les enuieus de mal penser
16 Ains les en veult
17 S'il puet tenser
18 Et si ne scet aussi de voir
19 S'ele le vouldroit recevoir
20 Si l'enuoie en pluiseurs parties
21 A des amis a ses amies
22 Et a tous ceus generalment
23 Qui aimment bien et loiaument
24 Por ce par pluiseurs li enuoie
25 Qu'il veult qu'en aucun lieu le voie
26 Cele pour qui fu commencie
27 Et moienne et parfornie
28 Car quant la verra ou orra
29 Apertement savoir porra
30 Que por s'amor a esté faite
31 Car de tel chose
32 A dedens traite.
33 Que vëoir porra clerement
34 Que c'est fait por li p[ro]prement
35 Ne nulz autres ne le savra
36 Se par li n'est ne ja n'avra
37 Pooir queil s'en apercoiue
38 Si li pri qu'ele en gré recoive
39 Que por li l'ay empris a faire
40 Car moult est franche
41 Et debonnaire.
42 Et puis commence a sa matiere
43 Qui commence en ceste maniere
44 Seignor j'ai oÿ des m'enfa[n]ce
45 Que sa grace fist demoustrance
46 Aucune fois de verité
47 Por ce mes mos ay recite
48 Que voloir de dire
49 .I. songe ay.
50 N'a pas gramment
51 Que le sonjay.
52 Une nuit en temps de moissons
53 Estoie en mon lit a Soissons
54 Forment du cuer pensis par m'ame
55 Ce fu la veille Nostre Dame
56 Com appella l'assumption
57 Pensant en bone entencion
58 Que loing de mon pais estoie
59 Ne pas tost venir n'i pooie
60 En cele nuit me fu avis
61 Que je fui par oisiaus ravis
62 Et portez en une forest
63 Que lors estoit et encore est
Folio 154r
64 S'ele est tele com je cuidoie
65 Que elle estoit quant je sonjoie
66 Plainne de bestes moult diverses
67 Verdes jannes bleues et perses
68 Noires faunes yndes les unes
69 Blanches et noires rouges brunes
70 Et les autres d'autre maniere
71 La avoit mainte beste fiere
72 Lyons liepars et autres bestes
73 Faisans par le bois grans tempestes
74 De sangles et de pors sauvages
75 Retentissoit tous li boscages.
76 Ours y avoit et vnicornes
77 Et autres bestes qui ont cornes
78 Que dains cheuriaus sauvages bous
79 Qui d'arbrissiaus broustent les brous.
80 Aveques les sauvages bestes
81 Et s'i avoit connins et lieures
82 Leus et gourpis et hericons
83 Qui ont poingnans les pelicons
84 Et autres que nommer ne sai
85 N'en ramembra[n]ce ne les ay
86 Por la plenté que j'en veoie
87 Ainsi qu'en penser estoie
88 .I. po regardai devers destre
89 Ilec une beste vi nestre
90 Que l'en veoit d'une valee
91 Qui estoit d'orties fermee
92 De ronces et de fort espines
93 Por coi toutes bestes voisines.
94 Redoutoient forment a faire
95 En la valee lor repaire
96 Qui de la beste la faiture
97 Porroie deuiser grant cure
98 Conuendroit metre au raconter
99 Et si ne porroit riens monter
100 A ce c'on peüst bien descrire
101 Sa biauté tant y a a dire
102 D'une chose me merueilloie.
103 Quant cele beste regardoie
104 Qu'il n'i avoit beste nis une
105 Tant fust estrange ne commune
106 Qu'ele n'eüst de lor coulour
107 Tant recevoit elle du lour
108 Sans faire a elles nul domage.
109 Moult regardai par le boscage
110 Mais je ne vis nis une beste
111 Qui a cele ne feïst feste
112 Par samblant pas ne le haoient
113 Car a leur pooir l'aprochoient
114 Vers li tornoient lors sentiers
115 Tant l'aprochoient volentiers
116 Por l'amor de sa douce alaine
117 Car douce estoit et bone et sainne
118 Por s'alaine qui en issoit
119 De trestous mauls
120 Les guarissoit.
121 Por ce toutes communaument
122 Les suivoient fors seulement
123 Li dragons qui ne la porroit
124 Sentir por ce que il morroit
125 Tantos qu'il sentiroit l'alainne
126 Qui les autres a sante mainne
127 Car en li tant venin habonde
128 Qu'il ne puet entir chose monde
129 Por ce quant savoit sa venue
130 N'i avoit puis regne tenue
131 Mais a grant erre s'en tornoit
132 Es leus desers et destornoit
133 Toutes les bestes miex valoient
134 De sa doucour quant l'i trouuoient
Folio 154v
135 Pourquoie chascu[n]s bien dire en doit
136 E[t] quechascune en amendoit
137 Tele beste soit beneoite
138 Par cui a bien faire convoite
139 Chascune beste qui le voit
140 Et quant ainsi ouvré avoit
141 La beste par grant atemprance
142 Receuoit par sa soustenance
143 Et sans plus que l'en convenoit
144 Trestout ainsi se maintenoit
145 Et puis aloit en son repaire
146 Sans fair aus
147 Autres nul contraire
148 Et quant les autres ne venoient
149 Tantost cele place lessoient
150 Si s'en aloient l'autre part
151 Si com Fortune les depart
152 Quant du lieu furent deseruees
153 Les bestes et aillors alees
154 Lors demorai sans compaignie
155 Si fui en grant merancolie
156 Comment aucun trouver porroie
157 Que de ce que veü avoie
158 Me deist la signifiance
159 Je n'i fis gueres d'arrestance
160 Quant je dedens le bois oÿ
161 Tel chose qui moult m'esioi
162 Car j'oï si grant melodie
163 C'onques tele ne fu oye
164 En citoles et en vieles
165 Oÿ faire notes nouveles
166 Danses et sons poitevinois
167 Oÿ encors sarrazinois
168 Tymbres y avoit
169 Et arainnes
170 Psalterions muses douceinnes
171 Cheuretes buisines tabors
172 Dont moult me plaisoit li labors
173 Instrumens de toutes maneres
174 Y avoit et a vois plenieres
175 Chantoient cil qui les menoient
176 Et qui bien faire le sauoient
177 Cha[n]connetes moult coi[n]tement
178 Et moult tres enuoisieement
179 Cha[n]toient motes et conduis
180 Si comme cilz qui les conduis
181 N'avoient pas trop encombrier
182 Mais de ruine descombriers
183 Et de tout ce qui les pot nuire
184 Moult est bons mestiers qui scet d'jure
185 Sages a faire tele feste
186 Et si joieuse comme ceste
187 Apres quant oÿ la joie
188 Que si volentiers escoutoie
189 Et qui bien me devoit seoir
190 Lors me prist grant fain de vëoir
191 Ceulz qui de joie maintenir
192 Sorent si bien a chief venir
193 .I. po me pris a acouter
194 Sor l'erbage pour escouter
195 Quel part la vois de ceulz oye
196 Por torner la tout droit
197 Ma voie.
198 Forment alay plus n'y [dir]ai
199 Devers le bois si regardai
200 Et vi venir la compaignie
201 Que tant avoit conuoitie
202 Menant grant joie et grant deduit
203 Moult bien estoient de ce duit
204 Tuit cil qui la erent venu
205 Grant et petit gros et menu
206 Quant je les vi j'ai oï grant joie
207 Qu'a paines dire le porroie
208 Si m'aprochai d'ex .i. petit
209 Car j'avoie grant apetit
210 Et grant desirrier du sauoir
211 Se par l'un d'eulz porroie avoir
Folio 155r
212 La droite interpretation
213 Et la vois doucement oÿ
214 En mon cuer forment le prisoy
215 Et cil a dit bien auisai
216 Qu'il estoient de grant afaire
217 Car de samie ou de tartaire
218 Ou de drap d'or de grant value
219 Avoit chascuns robe vestue
220 Et forrees de vairs menus
221 Tous ceulz qui la furent venus
222 En ordre trestout en alant
223 Doy et doi aloient balant
224 Li un et li autre danoient
225 Li autre doi et doi ioustoient
226 Et li autre alaient chantant
227 De ce me vois je bien vantant
228 Conques plus bele compaignie
229 Onc d'oreille ne fu oye
230 Ne qui miex peüst estre oye
231 De faire feste en nule guise
232 Entre les autres voi venir
233 .I. home qui bien maintenir
234 Se sot a guise d'ome noble
235 Et dessi en constentinoble
236 N'ot plus bel nul je croi de li
237 Por coi assez plus m'abely
238 A bien regarder en figure
239 Et sa biaute et sa faiture
240 Il estoit tiex com je dirai
241 Que je de mot n'en mentirai
242 En li de messeant n'a poir
243 Drois estoit gros
244 Et lons a point
245 Et ot coulor v[er]nie et vermeille
246 Au regarder oÿ grant merveille
247 Dont tel creatur venoit
248 En sa main .i. sceptre tenoit
249 Qui estoit moult et bele et bone
250 Et ot ou chief une couronne
251 D'or et de pierres precieuses
252 A regarder moult deliteuses
253 Cheveus ot qui bien li seoient
254 Et aussi comme or reluisoient
255 Et avoit robe d'un dyapre
256 Non pas trop rude ne trop aspre
257 Mais si bon comme l'en pot faire
258 Je n'en sai nul de cela faire
259 N'il n'en est nul mien escient
260 Ouurez de pelles d'Orient
261 Ert de bestes et a oysiaus
262 Moult estoit biaus li damoisiaus
263 Et la cote moult enuoisie
264 Encor estoit elle aufroisie
265 D'un riche orfroy moult noblement
266 Ou il ot assis cointement
267 Saphirs et mainte bone pierre
268 Cil qui estoit si enuoisiez
269 Et si cointement orfroiez
270 Estoit montez sor .i. destrier
271 Dont li lorain et li estrier
272 Estoient trestout d'or massis
273 De la sele ou ert assis
274 Estoient li arcon d'yuoire
275 Si bel qu'enuis le porriez croire
276 Poitral cengles je qu'en diroie
277 Tuit estoient de cuir de soye
278 Les paniaus de samis estoient
279 Tel com a la sele afferoient
280 Et du destrier en nule terre
281 Nul plus bel ne peüst on querre
282 [.]III. chevaliers por li conduire
283 Si que nul ne li peüst nuire
284 Avoit entour lui
285 L'un a destre.
286 Li autres estoit a senestre
287 Et li tiers qui bien auenoit
288 Estoit a pié et si menoit
289 Par les resnes le damoisel.
Folio 155v
290 Par la chantoient li oisel
291 A haute vois si doucement
292 Com se Diex y fust proprement
293 Aprez en compaignies beles
294 De dame et de damoiseles
295 De chevaliers et d'escuiers
296 Et de clers la fu li huiers
297 Et li esbatres de saison
298 Et li iouers car par raison
299 Cil doient mener bone vie
300 Qui sont en bone compaignie
301 Gens de toutes condicions
302 Et orent lor ententions
303 D'ensuiuir toute loiauté
304 Et n'ot en eulz crueusete
305 Quant j'oï tout cest atrait veü
306 Et leur couvine perceu
307 Por ce qu'a eulz parler voloie
308 Me mis je si dedens leur voie
309 Qu'il me virent premierement
310 Lors saluai apertement
311 Celui qui Diex la seignorie
312 Avoit et puis la compaignie
313 Aprez moi gaires n'atendi
314 Et me dist Diex te sault amis
315 Qui es tu et qui t'a cy mis
316 Et je qui de mentir n'oï cure
317 Li contai toute m'aventure
318 Tout ce que j'avoie veü
319 Li dis au miex que j'ai peu
320 Des bestes que veü avoie
321 Li dis tout ce que je savoie
322 Et comment par la souatume
323 Qui de l'une issoit par coustume
324 Toutes les autres la suiuoient
325 Et comment elles s'en aloient
326 Quant cele beste debonnaire
327 S'en retournoit
328 En son repaire.
329 Quant mon conte li oÿ conte
330 Et il l'ot par sa grant bonte
331 Escoute moult courtoisement
332 Lors m'apela moult doucement
333 Et si me dit se je cuidoie
334 Et bien asseur en estoie
335 Que mon bien fait a deseruir
336 Voussisses bien et moi servir
337 Le cuer outreement avoir
338 Je te feroie bien savoir
339 La volenté de ce que quiers
340 Et encor se tu me requiers
341 Et tu a moy.
342 Veulz faire homage
343 Je te farai de ce bien sage
344 Quant je l'oÿ je li di sire
345 Qui vous estes
346 Me veilliez dire
347 S'il vous plaist
348 Avis que vos hons soye
349 Car trop envis
350 Hons deuendroie
351 A homme que je ne connusse
352 Quel domage que g'y eusse.
353 Lors dist et je le te dirai
354 Et ton cuer en assouuirai
355 Car il a en toi ce me samble
356 Bien foy et loial
357 Ce me samble
358 Amis je sui li Diex d'amors
359 A cui amant font leurs clamors
360 Leur complaintes et lor proieres
361 Et si sui cilz qui lor proieres
362 Fai embracier humilité
363 Ou mont n'a ville ne cité
364 Chastel ne bourc
365 Ne manantie
366 Que je n'aye seignorie
367 Si fais les orgueillous chëoir
Folio 156r
368 Je fais les humbles hault seoir
369 Je fais bien des couars hardis
370 Et les hardis acouardis
371 Je respasse les combatans
372 Je sui les plus cois esbatans
373 Je fais aus nices sens avoir
374 Je fai bien ceulz qui ont savoir
375 Et les riches fais besoigneus
376 Je fais penser les
377 Maulz soigneus
378 Quant il me vient bien a talent
379 Nul ne puet a mon maltalent
380 Contrester tant ai g[ra]t hautece
381 Je sai bien enseignier largece
382 Je fai bien les plus sains doloir
383 Je fai de tous a mon voloir
384 Je fais plus com ne puist cuidier
385 Devant moi fait tous jors voidier
386 Je fai merveilles trop apertes
387 Quant je veil bien ouvrer a certes
388 Or pues tu bien aperceuoir
389 Qui je sui et savoir de voir
390 Que je puis toute chose faire
391 Si ne te dois mie retraire
392 De tost entrer en mon service
393 Car tu t'en tentoies por nice
394 En la fin car nulz par haussage
395 Ne por avoir ne por lignage
396 Sus moi riens ne conqueste a force
397 De moy servir donques t'efforce
398 Ne jamais ne t'en escondis
399 Quant l'oÿ ce si respondis
400 Sire par vostre courtoisie
401 Vous pri qu'il ne vous ennuit mie
402 Se je me sui tant deffendus
403 Car pieca me fusse rendus
404 A vous se je vous congneusse
405 Et se le vostre non sceusse
406 Vostre pooir bien connoissoie
407 Por ce que je sentu l'avoie
408 Mais si tost con je le senti
409 A vous servir me consenti
410 Et vers vous est mes cuers donnez
411 Por Dieu si le me pardonnez
412 Se j'ai mesfait car bien recorde
413 Vous requier je misericorde
414 Car de verité bien savez
415 Qui vous pieca mon cuer avez
416 Li Diex d'amors lors descendi
417 Et je mes mains lors li tendi
418 Si deuing ses hons ligement
419 Puis me dist moult cortoisement
420 Amis tu as eü domage
421 En ce que que tu as ton corage
422 Vers moy si longuement cele
423 Lors dis et comment reuele
424 Le vous eusse je biau sire
425 Lors me prist en riant a dire
426 Amis dames et damoiseles
427 A moult par le pais de beles
428 Nobles cointes et enuoisiees
429 Qui de par moi sont establies
430 A recevoir des bons des sages
431 Les services et les homages
432 S'a une pieca faite eüsses
433 En non de moi cointes en fusses
434 Ne jamais quites n'en seras
435 Devant qu'ainsi fait l'aueras
436 Si li respondi simplement
437 Prestez moi donques hardement
438 Et sens que je puisse ce faire
439 En tele maniere
440 Qu'il puist plaire
441 A cele a qui je le dirai
442 Que je por vous m'enhardirai
443 Et que si grans biens m'en aviengne
Folio 156v
444 Qu'en vostre non a sien me tiengne
445 Li Diex dist si bien m'os pleu
446 Tout ce que je en oÿ veü
447 Que je mentieng a bien paie
448 De tant que je t'ai essaie
449 Avec moy .i. po en vendras
450 Et tout erranment aprendras
451 De t'avision grant partie
452 Et savras qu'ele senefie
453 Li Diex sor le destrier monta
454 Que tous les autres seurmonta
455 Et me fist baillier .i. cheval
456 Si me mena delez le val
457 La ou la bele beste ala
458 Mais poy d'autres bestes y ala
459 Car la valee est si volose
460 Que nule autre estre n'i ose
461 Tant soit fiere ne grant ne grosse
462 Dedens le val ot une fosse
463 Ou la bese se reposoit
464 Mais la mule aler n'osoit
465 Li Diex lors me moustra la beste
466 Qui moult estoit
467 Bele et honneste.
468 Et dsst vez la une panthere
469 Or me conte verité frere
470 Est ce la beste que veis
471 De qui tant de bien me deis
472 Je li respondi oil sire
473 Or me veilliez s'il vous plest dire
474 Par amors et par cortoisie
475 De trestout ce que senefie
476 Or me soies dist il entiers
477 Je le te dirai volentiers.
478 Amis la beste qui est bele
479 Et noble senefie cele
480 Dont si desrrez a savoir
481 Que s'amour peusse avoir.
482 Et je te dirai la mistere
483 Car tout aussi com la panthere
484 Est d'autres bestes renommee
485 Aussi est cele en sa contree
486 Des coulours qui es bestes erent
487 Et qui en la panthere apperent
488 Te dira la signifiance
489 Ce senefient l'abondance
490 Des vertus qui en li demeurent
491 Qui moult l'amendent et honeurent
492 Car por voir toutes graces bonnes
493 Que en toutes autres persones
494 Sont communement espandues
495 A en son corps seul retenues
496 Si veil que le samblant t'apere
497 Car aussi com d'une panther
498 A en li de chascune beste
499 La colour sans faire moleste
500 Ta dame en tel maniere tient
501 Les gardes quant ton corps retient
502 Sans ce que nul domage face
503 Aus autres car por ce de grace
504 Ne de vertu n'ont mie mains
505 Ne t'esmaies se tu remains
506 Por li servir .i. po en paine
507 Or enten et je de l'alainne
508 De la beste te conterai
509 Et le voir t'en exposerai
510 La beste qui est douce et bonne
511 Qui au malades s'amor donne
512 Por coy les bestes le suiuoient
513 Qui la grant doucor en sentoient
514 De cele qui de vrai cuer aimmes
515 Et por qui ton seignor me claimmes
516 Ce senefient les paroles
517 Qui ne sont ne nices ne foles
518 Mais sages et bien atemprees
519 Et de raison bien couuernees
520 Et il y pert bien sans doutance
521 Chascuns volentiers les eschange
522 Car la samblance n'est pas vainne
523 Car p[ar]ole si est alaine
524 Ce que l'alainne s'issoit
525 De la panthere garissoit
Folio 157r
526 De cele a qui tu es prisons
527 Sans estre en buies ne en fers
528 Tout ainsi guerist les enfers
529 Nulz n'est si plains de vilennie
530 D'orgueil d'outrage ne d'envie
531 Se tu la veulz bien escouter
532 Que ne la sache hors bouter
533 Tous maulz et entendre
534 A bien faire.
535 La fault il bien prendre examplaire
536 Pour guerir de si grant domage
537 Et d'orgueil d'envie et d'orage
538 Le dragon qui ne puet entir
539 La douce alaine sans mentir
540 Senefie les enuieus
541 Enuenimez et ennuieus
542 De qui furent toutes persones
543 Qui ja content paroles bones.
544 Por ce de duel creueroient
545 Se il aucun bien dire oient
546 Si s'en fuit cele ge[n]t despite
547 Es liex desers ou nulz n'abite
548 Fors ceulz de lor condition
549 Ceulz dont je te fais mention
550 Engendra orgueil en envie
551 Par despit et par vilonnie
552 Qui en firent les aliances
553 S'en valent pis les acointances
554 Car les condicions du pere
555 Retiennent bien et de la mere
556 Ce que si atemprement
557 Retiennent son soustenement
558 La beste et tantost s'en aloit
559 Que de riens plus ne li chaloit
560 Ce senefie l'atemprance
561 De cele de qui l'acointance
562 Te met d'amer en volenté
563 Tant vois de bien en li plante
564 Car atempreement jouer
565 Veult en esbatre et a jouer
566 Son temps et ses fais et ses dis
567 Sans vilonnie et sans mesdis
568 En toute riens est contempree
569 Veult s'en doit estre miex amee
570 Je te veil dire a la parclose
571 De la valee qui enclose
572 Est de ronces avec orties
573 Et d'espines bien apointies
574 Et de la fosse que descrire
575 Veil de chascun que c'est a dire
576 Tant scet bien chascuns de l'ortie
577 Que par mi robe ne point mie
578 Et aucun se trueve en tel point
579 Qui est san robe si le point
580 A ce l'amoureuse pensee
581 Puet et doit estre comparee
582 Car point ne blece les vestus
583 Quant de son cuer est desuestus
584 Aucuns lors les point et assault
585 Moult font a doubter tel assault
586 La ronce point et si ahert
587 Si fort qu'enuis se desahert
588 Nulz qui ens se soit embatus
589 Qu'il ne chiee et soit abatus
590 Cilz desirs la ronce resamble
591 Car cil qui a desir s'assamble
592 Il soufferroit plus d'un mentir
593 Ains qu'il s'en peüst departir
594 Sans mal souffrir ne destorbance
595 Por destorber car sans doubtance
596 On va envis arrier gesir
597 De ce de quoi on a desir
598 Par les espines qui si poignent
599 Que toutes bestes
600 Les resoignent
601 A faire en tel leur lor repaire
602 Ou la bele beste repaire
603 Dois les mesdisans susposer
604 Qui ne se veulent reposer
605 Du mal noncier et entre metre
606 Tous jors se veulent entremettre
607 De males nouveles porter.
Folio 157v
608 Chascuns poignent et aguillonent
609 Et pour voir a entendre donne[n]t
610 Ce qui ne puet estre prouue
611 C'est li fus qu'il ont controuue
612 N'il n'est ppersonne nule nee
613 Tant soit de bone renommee
614 Ne nulz tant soit de bien garnis
615 Qu'il ne soit par lui escharnis
616 Se plus ne se pueent grever
617 Ou plus mauvais los aleuer
618 Tant sont de malvaise doctrine.
619 A l'assamblance de l'espine
620 Que ceulz veult plus en parfont poindre
621 Et quant a eulz pis ne puet faire
622 Qu'il se cuident arriere traire.
623 Si prent leur robe et le despiece
624 Et souvent en detie[n]t la piece
625 Ainsi fait a autrui domage
626 Et si n'i a poi[n]t d'avantage
627 Tout ainsi font li mesdisant
628 De leurs faus mos
629 Et par lor malvaise parole
630 Qui les bons sans raison afole
631 Tele gent soit arsse et brulee
632 Qui oste bone renommee
633 Et font tenir a vilonnie
634 Ce qui est bien et cortoisie
635 Ce n'est pas merveille sans doute
636 Se male gent et si estoute
637 Car tiex espines perilleuses
638 Sont a servir et trop
639 Crueuses.
640 Or entent devine pensee
641 Je te dirai de la valee
642 La ou la bele beste habite
643 Qui par son non panther est dite
644 La valee pour verité
645 Senefie humilité
646 Ou tele que ues cuers demeure
647 Comme en son propre lieu demeure
648 Orgueil maintiennent hautement
649 Et humilitez bassement
650 Por tant puet estre comparee
651 Humilitez a la volee
652 Par le mont aussi sans mesprendre
653 Puet on le mot d'orgueil entendre
654 Honnie soit tele montaigne
655 Nulz n'i monte qui ne s'en plaigne
656 Qui le mont d'orgueil velt monter
657 Entre les folz se puet conter
658 Que par son fol outre cuidier
659 Se fie si en son cuidier
660 Qu'il enchiet aprés en la merde
661 Car qui mal fait
662 Drois est qu'il perde
663 Cele pas si ne te maintient
664 Qui ta santé en sa main tient
665 Ains se maintient honnestement
666 Entre la gent et sagement
667 Au val d'umilité s'eslesse
668 Et le mont d'orgueil fuit et lesse
669 Or est temps que je te deuise
670 De la fosse qui est assise
671 En la valee dessus dite
672 Qui par moy t'a esté descripte
673 Et en le panthere reprise
674 Si t'en dirai aucune chose
675 Par la fosse enten la simplece
676 De cele qui par sa noblece
677 Et par sa bonne renommee
678 Et tout ton cuer et ta pensee
679 La fosse la valee passe
680 En parfondete et est plus basse
681 Aussi cil qui a la droite adresse
682 Et la voie tient de simplece
683 Il doit humilité avoir
Folio 158r
684 Et plus encor ce dois savoir
685 Le plus est quant ala descuevre
686 Par maintient simple et met a oevre
687 Or sces tu bien que la valee
688 Est humilite comparee
689 Dont se je simplece appareille
690 A la fosse ne t'en merveille
691 Et s'est bien par raison assise
692 La fosse en la valee estruisse
693 Car simplece est je n'en doubt mie
694 En humilité herbergie
695 Tu as bien veü en figure
696 Ce que la bele nete et pure
697 Qui a ton cuer entierement
698 Pues vëoir tout apertement
699 Or alons tous esbanoier
700 Entour la haie et tornoier
701 J'ai cheval de grant volenté
702 Et de doner entalente
703 Quant je qui os grant fain d'esbatre
704 Des esperons le pris a batre
705 Par dessus la haie sailli
706 De grant paor l'os tressailli
707 Quant je me vi en la valee
708 Et que la haie oÿ trespassee
709 Forment les espines doutoie
710 Quant vers la valee venoie
711 Mais .i. petit m'asseurai
712 De la paour que j'endurai
713 Si m'en alai par mi le val
714 Tout contremont et contreual
715 Tant que j'oï la voie choisie
716 En la panthere estoit couchie
717 Moult volentiers le regardoie
718 Mais samblant faire n'en osoie
719 Grant piece illec me reposai
720 Mais onques mot sonner n'osay
721 Que la panthere n'en grouchast
722 Ou qu'a moi ne se corroucast
723 Car me pesast se groucier
724 Le veisse ne corroucier
725 Je me cuidai bien
726 Sans plus faire
727 Vers ma compaignie retraire
728 Mai je trouvai si fort passage
729 Que j'en oÿ par mi le visage
730 Et par mi le corps mainte plaie
731 Par les espines de la haie
732 Et de mon cheval m'abatirent
733 Et de ma robe me rompirent
734 Quant ma robe fu desciree
735 Soi la char toute boussoufflee
736 Les orties qui me poignoient
737 Et des ronces qui tenoient
738 Lors n'ot il en moy qu'airer
739 Car por sachier ne por tirerq
740 Ne m'en poi onques traire fors
741 Car trop estoit la haie fors
742 Tout a ce point ainsi m'avint
743 Qu'avec moi le Dieu d'amors vint
744 Qui de la mort me respita
745 Car li cuers moult li apita
746 Quant ainsi me vit aleter
747 Et me fist tantost hors geter
748 Et si me fist mener arriere
749 Avec lui en une littiere
750 Ou il avoit fleurs de lis roses
751 Violetes et autres choses
752 Qui moult tres bone odour rendoient
753 Et mes doleurs moult m'aleloient
754 Un po aprés ce m'arresta
755 Li Diex et si me dist de la
756 Ou tu as esté que te samble
757 Sire dis je li cuers me tramble
Folio 158v
758 Toutes les fois qu'il m'en souuient
759 Mais puis que dire le convient
760 Tout droit parmi le voir irai
761 Que ja ne vous en mentirai
762 Quant j'oï sailli oultre la haie
763 Quant moult m'esbahit et esmaie
764 J'alai tant par mi la valee
765 Que la panthere oÿ retrouuee
766 Mais onques samblant n'en soy faire
767 De ce que tant m'en pooit plaire
768 Que mon cuer oster n'en pooie
769 A corroucier tant la doutoie
770 Et quant je cuidai revenir
771 Lors me pristrent a retenir
772 Espines ronces et orties
773 De moi grever tous aaties
774 Aussi comme vous me trouuastes
775 Vostre merci quant m'en getastes
776 Li Diex me dist lors doucement
777 Amis por ton ensaignement
778 Est tout ce que tu as veü
779 Aussi com je l'ai bien veü
780 Neent plus que osas la teste
781 Tourner envers la bele beste
782 N'eus tu onques hardement
783 Que deisses apertement
784 Ne descouurisses ton corage
785 A ta dame la bone et sage
786 Et si as esté assaillis
787 Des espines et mal baillis
788 Qui les mesdisans senefient
789 Qui des amans tous jors mesdient
790 Aussi bien que se dit eüsses
791 Ce que dire et faire deüsses
792 Si te lo que quant tu savras
793 Que tous temps lieu et point avras
794 Que tu tous tes meschiez dies
795 Et toutes tes griez maladies
796 Car se tu li as descouuertes
797 Ja n'avra si cruel cuer certes
798 Envers toy qu'ele ne s'e[n] dueille
799 Et que plus de biens ne te veille
800 Je ne puis plus or remanoir
801 Tu ne t'en n'as en ton manoir
802 Jusqu'a tant que je te reuoie
803 Mais je veil que la te convoie
804 Et cele noble compaignie
805 Esperance qui ne fault mie
806 A ceulz qui de bon cuer aimment
807 Et qui de bon cuer le reclaimment
808 Dous penses ses loiax amis
809 Qui tout son cuer a en vous mis
810 T'ira compaignie tenir
811 Aveques le dous souvenir
812 Menra qui si a point le sert
813 Que moult grant loier si desert
814 En nostre chemin en entrasmes
815 A l'ostel le Dieu en alasmes
816 Qui tout estoit plain de leece
817 Car joie en tous biens s'i adrece
818 La ne falloit que soushaidier
819 Se je bien me peusse aidier
820 Moult eüsse eü de delit
821 Mais tantost demande le lit
822 Car moult malades me sentoie
823 Et encore moult me doloie
824 Es mauls que j'oï est chose vraie
825 Quant je fui cheus en la haie
826 Lors vint dous penser esperance
827 Et sousuenirs qui moult s'auance
828 Chascun d'eulz por moi conforter
829 En .i. lit me firent porter
830 Ou moult d'ebatement me firent
831 Et moult de biaus examples dirent
832 Lors moult doucement m'apelerent
833 entr'eulz .iii. et m'amonnesterent
Folio 159r
834 Que je par amors lor deisse
835 Ma volenté et descouurisse
836 Se de riens estoit ma pensee
837 En loiaus amors assenees
838 Je leur dis c'on dit fait avoie
839 Ou ma volenté demoustroie
840 Si commencai le dit a lire
841 Si com vous poez oir lire
842 Je lo amors quant daigne moi atraire
843 A li servir et tous
844 Iours sans retraire
845 Et a ce m'a par sa doucor mene
846 Que j'ai mon cuer en tel leu assene
847 Dont j'e oÿ tant de biens tesmoignier
848 Que puis avoir pour nule creature
849 Car tant de biens a en li mis nature
850 Que tous li mons l'en deueroit blasmer
851 Si ne m'en doit nulz ce m'est vis blasmer
852 S'en li amer ay mis toute m'entente
853 Car le bon fruit doit on querre en bonne ente
854 Et j'oï chascun tesmoignier
855 Qu'elle est bonne.
856 Qu'en puis je mais se mon corps habandonne
857 A li servir de bon cuer de loial
858 Sans ja penser faus tour ne desloial
859 Quant de chascun a si bon tesmoingnage
860 C'on dist qu'ele est bone et cortoise et sage
861 C'est sans le bien dont je croi ma veue
862 Que nature ne la fist mie vue
863 Quant la forma ains le vesti figure
864 De membres biaus fais par droite nature
865 Chief yex front nez
866 Bouche menton ensamble
867 A si bien fais que l'esgarder me samble
868 Qu'en li n'a riens qui a reprendre face
869 Tant est bien faite et de corps et de face
870 Avec ses biens et de tres douce chiere
871 Simple en regart et de bele maniere
872 Et s'est ou poin meillour de sa jonece
873 Por li me tient amors en tel destrece
874 Qu'a li servir m'otroi sans repentir
875 Or me veil a bone amor consentir
876 Que je de li secours prochainement
877 Mais je ne voi comment aleiement
878 Aie de li car en moi tant n'a mie
879 De hardement que je mon cuer li die
880 Apertement. mais qu'en moi dementant
881 Ou en chantant si m'en dueil plus entant
882 Que naures sui et ne m'en ose plaindre
883 Car la plaie est plus griez a restraindre
884 Quant on ne l'ose au mire descouurir
885 Hé bone amor car me veilliez ouvrir
886 L'uis de pitié dont cortoisie est dame
887 Car autrement ne voy mie par m'ame
888 Comment des mauls puisse avoir aleiance
889 Que j'ai par bien amer sans deceuance
890 Non pas portant que la douce mesaise
891 Qui vient d'amer a sousfrir ne me plaise
892 Ains me plest tant quenqua de vous me vient
893 Riens ne me doit ce
894 M'est avis desplaire.
895 Qui de vous soit ne tourner acontraire
896 Ains vous doit miex servir que sans mentir
897 Trestout li mal que vous faites entir
898 Aus fins amans ne sont que por sauoir
899 Que c'est grant bien de don d'amie avoir
900 Car qui des mauls a eü a plenté
901 Le bien recoit de meillor volenté
902 Si doit chascuns vostre plaisir atendre
903 Car vous poez contre .i. mal
904 Cent biens rendre
905 Voire assez plus c'on ne porroie nombrer
906 Et si poez de tous maus destorber
907 Ceulz qui servir veulent entierement
908 De cuer de corps sans nul deceuement
909 Por ce coument que me faciez doloir.
Folio 159v
910 Veil je de vous atendre le voloir
911 En vous seruant de
912 Bon cuer et d'entier
913 Et pour si vous pri que
914 Mettez ou sentier
915 Cele que j'aing qu'en pitié me recueille
916 Et que mes maus amenuisier me veille
917 Et li veilliez descouurir
918 Mon martire
919 Car je ne l'ose a li dire n'escrire
920 Et la raison de ce que je li ose
921 De mon penser descouurir nule chose
922 Si est por ce que jamais bien n'auroie
923 Se refuser de madame me oye
924 Comment se puet puis cuer d'omme esioir
925 Qu'il li convient refus de dame oir
926 Ce ne porroit estre en nule maniere
927 Et si redoubt tant la gent
928 Mal parliere.
929 Que de poor vois tous por eulz tramblant
930 Si que je vous moustre le mien samblant
931 A cele qui bien me puet delegier
932 S'il li plaisoit de mes
933 Mauls allegier.
934 Car trop redoubt qu'il ne s'en apercoiuent
935 Car telz sentiers tex
936 Gens sauoir ne doivent
937 Car quant amours est a droit maintenue
938 Si doit de .ii. estre sceue
939 Se n'est de tel c'on sache loiaument
940 Qu'il est loiaus et aimme fermement
941 Et quant son mal on ne
942 Puet plus celer.
943 .I. tel ami por soy reconforter
944 Et por plus bel sa mesaise porter
945 Mais encor n'est pas temps que je l'apele
946 Quant fais sauoir ne l'ai encor a tele
947 A qui mes cuers loiaus desirs atache
948 Hé bone amor faites
949 Tant que je sache
950 Comment il m'est riens plus ne vous demant
951 Car je n'ay cuer que li die ne mant
952 En vous servir veil mon temps a louer
953 Por ce ce dit ay fait por vous loer
954 Et honorer et por cele au vif cler
955 Sans qui je ne porroie vis eschaper
956 Des maulz que j'ai por li a endurer
957 Se longuement le convenoit durer
958 Et lons espoirs n'estoit qui me conforte
959 De ce dit faire autre riens ne m'enorte
960 Et ce que cele en qui j'ai mis ma cure
961 Ne puist oir par aucune aventure
962 Je pri a tous amans au definer
963 De ce dit cy que si endoctriner
964 Veulent leurs cuers
965 Envers dame et atours
966 Ou l'en ne puet trouver
967 Fors bones mours.
968 Que chascuns cuers
969 Loiaument se maintiengne
970 Et de mal faire a son pooir se tiengne
971 Car qui se veult comme amant maintenir
972 De tous vices faire se doit tenir
973 Et ne mie tant seulement de faire
974 Mais de penser et de parler en taire
975 Por ce leur veil ce dit cy enuoier
976 Et si lor veil encor supplier
977 Qu'il ne le veulent par cortoisie lire
978 Que en tel leu qu'il afferra a dire
979 Quant temps et liex et raison en sera
980 Car je sai bien que pas ne targera
981 S'il est ainsi que la bele ne l'oye
982 Qui tous mes maulz puet conuertir en joie
983 Car elle est bone et bele
984 Et amiable.
985 Et a chascun cortoise et delitable
Folio 160r
986 Et est en fais et en dis gracieuse
987 Et si la truis si humble et si piteuse
988 Que quant elle par cest dit cy savra
989 Comment il m'est que pitié en aura.
990 Ja soit ce voir que mon mal n'en connoisse
991 Et ne sache por qui amor m'angoisse
992 Et si me doit soffire jusqu'a tant
993 Qu'amor ne voist en mon cuer embatant
994 Que li face pour voir aperceuoir
995 Que j'ai por li ces maus a recevoir
996 Cy fault li diz en aventure fais
997 Por ce mes maulz amenuisier le fais
998 Quant par ce dit ay ma pensee
999 A eulz descouuerte et moustree
1000 Il distrent puis qu'ainsi estoit
1001 Qu'amors d'amer m'amonnestoit
1002 Et que a li obeissoie
1003 Que par eulz secorus seroie
1004 Et me feroient compaignie
1005 Tant com je vouldroie la vie
1006 Des loiaus amans maintenir
1007 N'en cel lieu aler ne venir
1008 Ne porroie bien le deusse
1009 Qu'aveques moy ne les eusse
1010 Ainsi comme eulz a moy parloient
1011 Et ces paroles me disoient
1012 A tant li Diex d'amors revint
1013 Adonc peüst on plus de .xx.
1014 Manieres d'i[n]strume[n]s oyr.
1015 Qui la compaignie esioir
1016 Deuoient moult selon raison
1017 Quant li Diex vint en sa maison
1018 Encontre lui vint la deesse
1019 Por ce que la foule et la presse
1020 Ne peüst a eulz ennuier
1021 Furent devant li escuier
1022 Qui la foule et la presse osterent
1023 Et la voie lor descombrerent
1024 La deesse fors se lanca
1025 Au col le Dieu ses bras lanca
1026 Et puis estroitement l'acole
1027 Com cele qui n'estoit pas fole
1028 En aprez par les mains se pristrent
1029 Et puis a la voie se mistrent
1030 Et s'en tornerent vers la sale
1031 Qui n'estoit pas laide ne sale
1032 Mais bele et nete et bien paree
1033 De biaus draps d'or bien empenee
1034 Menuement de violetes
1035 Et d'autres diverses floretes
1036 Aprez ce vindrent menant joie
1037 De dens la chambre ou me gisoie
1038 En mon lit delez moy
1039 S'assistrent.
1040 Et par tiex paroles me distrent
1041 Amis bien doi joie mener
1042 Et toy de bien faire pener
1043 Quant nous t'avona tant adaignie
1044 Que nous t'avona acompaignie
1045 Avec nous en no mariage
1046 Et mis en nostre seignorage
1047 Se nous t'avona fait cortoisie
1048 Fai qu'ele soit bien emploie
1049 Par bien servir et sagement
1050 Et par obeir simplement
1051 Car de ce te faisons nous sage
1052 Se savoir veus en ton corage
1053 Joie d'amor par bien servir
1054 Il te conuendra a servir
1055 Car services fait bien avoir
1056 Ce c'on n'avroit por nul avoir
1057 Dont se tu veus d'amors ioir
1058 Fay que chascuns te doie oyr
1059 Et puis entendre teulz nouveles
1060 Qui soient cortoises et beles
Folio 160v
1061 Et se tu n'en sces pas la guise
1062 Ou tu ne l'as encore aprise
1063 Comment cilz se doit maintenir
1064 Qui veult d'amors a chief venir
1065 Dedens le Rommant de la Rose
1066 Trouueras la semence enclose
1067 La porras se tu veus aprendre
1068 Comment vrais ama[n]s doit entendre
1069 A servir amors sans meffaire
1070 Si nous en porrions bien taire
1071 Puis me dist ma dame Venus
1072 La deesse que je venus
1073 Estoie la de bon eur
1074 De ce me met moult asseur
1075 Car je sai bien dist la deesse
1076 Dont vient li max qui si t'apresse.
1077 Que vers li ne te pues deffendre
1078 Por ce ne te puis miex aprendre
1079 Comment vers li te deffendras
1080 Et comment tu te maintendras.
1081 Bien sai que as esté tardis
1082 Et coars or soiez hardis
1083 D'ore en avant et corageus
1084 Sans estre vilain n'outrageus
1085 Car qui aimme de fin corage
1086 Vilennie het et outrage
1087 Je respondi ma douce dame
1088 Tant a certes me dist par m'ame
1089 Li Diex que les vous voi seant
1090 Et bien l'en croi je vous crëant
1091 Autel li dis com je vous dis
1092 Car .ix. hardement non les .x.
1093 Tex com li miens est ce me samble
1094 Se il estoient mis ensamble
1095 Ne porroient pas bien soffire
1096 A ce que bien ossasse dire
1097 Mes mals a la douce panther
1098 A cui nule ne s'acompere
1099 Car paour m'a fait escouter
1100 .I. ver qui moult me fait douter
1101 Et le dist nostre clerc Adams
1102 Qui fu d'amis ja moult aidans
1103 En son chant ainsi le chanta
1104 Ce scet bien cil qui la cha[n]ta
1105 Trop font a l'amant hair
1106 Drois est c'on les doie hair
1107 Qui requierent hardement
1108 C'est que de desirrer folement
1109 Qui ne se pueent astenir
1110 Et sans partir sont escondit
1111 Orent andeus temps a soffrir
1112 Car ce c'on ne voudroit oir
1113 Quiert on souvent
1114 D'Adam ay je oÿ retraire
1115 .I. ver encor qui moult retraire
1116 Me fait de requerre asprement
1117 Et dist ce m'est vis ensement
1118 Ancois voie on refuser
1119 Celui qui trop prie
1120 Que celui desamonter
1121 Qui trop s'umilie
1122 Pour ce sueffre sa[n]s renier
1123 En espoir d'avoir merci.
1124 Et bien veil qu'il soit ainsi
1125 Car a seignorie
1126 A on mainte foys failli
1127 Par trop haster.
1128 Encor dist il allors sans doute
1129 .I. ver dont maint amant se doute
1130 Quant li souuient de la sentence
1131 Du ver li quelz ainsi commence.
1132 Folz est qui trop en son cuidier
1133 Se fie on voit aucun seur
1134 Le point d'enrichil
1135 Emprendre tant.
1136 Dont il aprez mendie
1137 Tout ce me fait Dieu proier
1138 Car miex me vient user toute
Folio 161r
1139 Ma vie en mon ioli souvenir
1140 Que par trop taillant desir
1141 Perdre tout a une sie
1142 Je voi moult bien ta conscience
1143 Dist la deesse et qu'en grant tence
1144 Es entrez contre toy meismes
1145 Car souvent avient que tu esmes
1146 A descouurir ta volenté
1147 Vers cele qui entalente
1148 T'a de li amer sans faintise
1149 Pour la valour et la franchise
1150 Que tu vois en li demorer
1151 Dont chascuns la doit honorer
1152 Lors avient que riens a li n'ose
1153 Dire ainsi com tu le proposes
1154 Car paor lores si te court seure
1155 Et si retorne en petit d'eure
1156 Que ne pues nis la bouche ouvrir
1157 Por ta pensee descouurir
1158 Si come .i. ymage entaillie
1159 Qui n'a vois ne sens ne oye
1160 Si as bien d'aide besoing
1161 Por la pensee et pour besoing
1162 En quoi tu as plus bel porter
1163 Et por tes grietez conforter
1164 Comme[n]t tu puisses traveillier
1165 A ce que sache ta pensee
1166 Tele qui est de toi amee
1167 Et de tant que tu m'as veue
1168 Miex t'en sera en ma venue
1169 Je te dirai que tu feras
1170 J'ai .i. dit que tu garderas
1171 Tant que tu cele avras trovee
1172 Qui desseure toutes t'agree
1173 .I. anelet cy convient metre
1174 Et enclorre dedens la letre
1175 Et si sera bien scellee
1176 Por la chose estre miex celee
1177 L'escript me bailla la deesse
1178 Qui ne veult mie que je cesse
1179 Ne que lesse d'amors la voie
1180 Ains veult que loiaus amis soie
1181 De dens ce dit moult bien escript
1182 Avoit la deesse et d'escript
1183 De mon dit toute la matiere
1184 Et dit le dit en tel maniere
1185 Dame cilz qui amors fine
1186 Destraint por vous si vous eatrainne
1187 De son cuer sans ja mouvoir
1188 Vous estes la medecine
1189 Qui de son mal la racine
1190 Poez du tout esmouuoir
1191 Por Dieu si l'ostez ou voir
1192 Il convient par estouuoir
1193 Que joie en son cuer define
1194 Or veilliez amors esmouuoir
1195 Vostre cuer et metre au voir
1196 Sentiers ou pitez chemine
1197 Se j'ai vo corps porueu
1198 Et a servir esleu
1199 Dessus toute creature
1200 J'ai fait ce que j'ai deu
1201 Car tout bien y sont veü
1202 Biaute bonté sens et mesure
1203 S'est bien raisons par droiture
1204 Que je mette en vous ma cure
1205 Car point ne m'ont deceu
1206 Mi oeil qui ont la figure
1207 De vostre bele faiture.
1208 A mon cuer amenteu
1209 Sans faire plus longue atente
1210 Vous doins mon cuer bele et gente
1211 Ne veilliez por mal tenir
1212 Se par escript la presente
1213 Car quant je vous voi presente
1214 Je ne sai que devenir
1215 De mon propos maintenir
Folio 161v
1216 Car si forment m'espoente
1217 Que ne sai que devenir
1218 Ce que bien sai qu'auenir
1219 Ne puis par droit maintenir
1220 Bien sai que je mesprendroie
1221 Se par droit avoir cuidoie
1222 Vostre amor. puis je plus dire
1223 Car jamais n'i auendroie
1224 Se par grace n'i venoie
1225 Morir porroit avant dire
1226 Se pitiez de mon cuer ma[r]tire
1227 Ne vous faisoit estre mire
1228 Car s'une conte tenoie
1229 Duche royaume ou empire
1230 Si me devroit il sousfire
1231 Se de vous amez estoie
1232 L'ame en qui j'ai plus fiance
1233 Qu'en toutes celes de France
1234 En cest derrain verselet
1235 A la premiere acointance
1236 Vous fis de mon cuer pitance
1237 Par cest petit anelet
1238 Or en faites chapelet
1239 A vostre doi mamelet
1240 Et ne l'aiez en doutance
1241 Car sachiez qu'au iouelet
1242 En valour petitelet
1243 A bien grant signifiance
1244 Quant j'oÿ tout cest escript veü
1245 Et de chief en chief bien veü
1246 A la deesse dis ma dame
1247 Moult tres grans mercis
1248 Car par m'ame
1249 Du dit n'avez rie[n]s oblie
1250 Car tout aussi me sens las
1251 Com je l'ai trouvé en lisant
1252 De ce me vois bien auisant
1253 Hé; Diex qu'ele tenist la bele
1254 Qui mon cuer a car je croi qu'ele
1255 Quant ce dit verra ou orra.
1256 Ja por ce pis ne m'en vouldra
1257 Por quoi car elle est bone et sage
1258 Et je l'aing de loial corage
1259 Se pour amor rendoie haine
1260 Mains en seroit et bone et fine
1261 Car nulz n'a tant au cuer d'air
1262 Ne doit por bien amer hair
1263 Mais volentiers vous requerroie
1264 Encor ma dame se j'osoie
1265 Que par amors me deissiez
1266 Et que certain me feissiez
1267 De ma dame or l'escoutez
1268 Por coy li amans est boutez
1269 En la lettre et qu'il senefie
1270 Car aussi ne le sai je mie
1271 Elle dist tu m'en orras dire
1272 Tant qu'il te deuera souffire
1273 Li aniax est en l'escripture
1274 Por ce que par la vient la cure
1275 De ton cuer et la seignorie
1276 Donras sans faire departie
1277 Plus bel que par mal autre chose
1278 Ma dame ou tout bien repose
1279 Qu'il n'a en li vice ne fraude
1280 Mais en l'anel est esmeraude
1281 Car la pierre c'est chose clere
1282 Qu'avec eulz porte grant mistere
1283 Et plus plaisans est anelés
1284 Qu'a donner autres ioueles
1285 C'on le porte au soir et au main
1286 Por ce c'on le voit en sa main
1287 Et li oeil voient c'est la somme
1288 Plus les mains que riens dessus l'omme
1289 Et yce puis bien por voir dire
1290 C'est ce c'on voit souvent et mire
1291 Celi qui le voit plus conforte
1292 Que li liex plest dont on l'aporte
1293 Se de l'anel veulz la puissance
1294 Avoir et la senefiance
1295 De lor et de la pierre bonne
Folio 162r
1296 Que chascuns a entendre donne
1297 Es quiex vertus pueent avoir
1298 La verité porras savoir
1299 Mais que tu veilles .i. dit lire
1300 C'uns clers fist
1301 Dont le non veil dire
1302 Que ja par moi ne t'ert cele
1303 Mestres Jehans est appelé
1304 L'espiciers cil qui la dite
1305 Pour ce qu'il a en son traictie
1306 De cele maniere traictie
1307 Com en bones meurs affaitie
1308 Tres bien et tres souffisaument
1309 Ne t'en dirai je pas granment
1310 Mais por ce que chascuns n'a mie
1311 Ce dit por ce me plest
1312 Il que j'en die.
1313 Et que clerement en expose
1314 Briement en somme a vue chose
1315 Premierement du chapelet
1316 Qui en guise de chapelet
1317 Le doit enceint et enuironne
1318 Et apres de la pierre bonne
1319 Li anelés si doit d'or estre
1320 Et porter de la main senestre
1321 Ou petit doit si com cilz conte
1322 Or est raisons que je te die
1323 Ce que li ors senefie
1324 Or est se je bien et avise
1325 De tous metaus cil c'on plus prise
1326 Et li plus fors et li
1327 Plus fermes
1328 Aussi doit aniaus en tous termes
1329 Avoir en son cuer fermete
1330 De la cause de netete
1331 Tele qu'il ne pense ne die
1332 Chose qui tourt a vilonnie
1333 Et si doit tant prisier sa dame
1334 Que pour son pris hee son blasme
1335 L'esmeraude c'est veritez
1336 Si a moult de prosperitez
1337 Dont aucunes te conterai
1338 Et aprés les exposerai
1339 Esmeraude est vers
1340 Et si dame.
1341 Grace abandona a la persone
1342 Qui par amors la receue
1343 Et si esclarcit la veue
1344 Amors donques qui l'esperance
1345 De l'esmeraude et la puissance
1346 Veult avoir il doit estre vers
1347 C'est a dire qu'il ait devers
1348 Ceulz qui bien aimment son corage
1349 Et si doit metre son usage
1350 En ceulz aussinc et congnoistre
1351 Qui se veulent d'amors acroistre
1352 Car les vers choses
1353 Tous jours croissent
1354 Et les seches tous jors descroissent
1355 Et cil en verdure se tiennent
1356 A grace si tres grant en viennent
1357 Que des bons des biaus et des gens
1358 Sont loe et de toutes gens.
1359 Et cil qui a ce faire entendent
1360 Les yex du cuer tant y amende[n]t
1361 Que nulz a eulz ne se puet prendre
1362 De tous biens connoistre et entendre
1363 De l'anelet ai dit en somme
1364 Et de la vert pierre c'on nomme
1365 Esmeraude et de sa puissance
1366 Briement et la signifiance
1367 Or te veil icy aprés dire
1368 De l'anelet et descrire
1369 Por coy miex en la main senestre
1370 Est portez qu'il n'est en la destre
1371 C'est por ce que de sa nature
Folio 162v
1372 Elle est mains encline a droiture
1373 Qu'a la destre et mains se scet traire
1374 Et ordure vilanie faire
1375 Et si porton en l'anelet
1376 Miex ou petit doit mamelet
1377 Com ne fait en nul autre doi
1378 Por ce par la foy que je doy
1379 Car toy en qui mon cuer se fie
1380 Que plus i gist et mort et vie
1381 Par l'anelet qui auironne
1382 Le petit doi et la couronne
1383 Demoustre qu'en tele maniere
1384 Doit par devant et par derriere
1385 Devers destre et devers senestre
1386 Loiaus amans en tous temps estre
1387 De pluiseurs graces corronnez
1388 Et tous entour auironnez
1389 Et s'il est dit aucuns qui die
1390 Que la pierre est ou doit mucie
1391 Dedens la main c'on ne la voie
1392 On lor puet bien par ceste voie
1393 Assez legierement respondre
1394 Ou doit de dens la main repondre
1395 La painne et si donne a entendre
1396 Que tout amant doie a ce tendre
1397 Qu'il puist a tous s'amor celer
1398 Com ne doit amour receler
1399 Car amor quant bien est celee
1400 Dure plus que la recelee
1401 Et se j'ai longuement conte
1402 De l'esmeraude la bonte
1403 Ne veil je par mon sermonner
1404 Pas dire c'on ne puis donner
1405 Anel ou autre pierre est mise
1406 Car chascuns est bons a sa guise
1407 Mais esmeraude et dyamans
1408 Doit estre entre les amans
1409 Miex que nule autre pierre ou monde
1410 Tant soit bele gente ne monde
1411 Si com tu as ja bien veü
1412 De l'esmeraude et perceu
1413 Si te dirai du dyamant
1414 Por coy il affiert a l'amant
1415 Dyamant est indiuisibles
1416 Et de toutes choses visibles
1417 Et cele qui de sa nature
1418 Puet miex durer en chose dure
1419 Car on puet vëoir clerement
1420 Com en taille legierement
1421 En voirre en pierre si tres dure
1422 Que nulz autres aciers n'i dure
1423 Ainsi li vrais amans resamble
1424 Le dyamant si com moi samble
1425 Car puis qu'il a s'entente mise
1426 En amer point ne se deuise
1427 Ains se tient tout entierement
1428 En .i. lieu sans departement
1429 Et si fait tant par sa purte
1430 Qu'il oevre es cuers
1431 Plains de purte
1432 Tant qu'amors ce li fait avoir
1433 Com ne donroit por nul avoir
1434 Quant la deesse m'ot ce dit
1435 Je mis aprés dedens le dit
1436 Que m'ot baillie .i. anelet
1437 Et de mon petit seelet
1438 Le seelai aprés de cire
1439 Lors pris dedens mon cuer a dire
1440 Que devant lors ne fuieroit
1441 Qu'a la bele le bailleroit
1442 A qui j'ai mon cuer octroie
1443 Et je tieng a bien emploie
1444 Car se je le trouuoie a point
1445 De cele volenté m'apoint
Folio 163r
1446 Que ne m'en porroie tenir
1447 Diex m'i doinst en bon point venir
1448 Tout en pensant a cest afaire
1449 Commant je porroie a chief traire
1450 Por la paine qu'oïe eue
1451 M'endormi tantost de venue
1452 Et si resoignoie en songent
1453 De ce ne vous vois mencongent
1454 Et me sambloit que je veoie
1455 Ma dame et que je li bailloie
1456 Le dit et l'anelet ensamble
1457 Et elle me dist ce me samble
1458 Que ja ce ne li auendroit
1459 Et que le dit ja ne tenroit
1460 Car chose qui est seellee
1461 A prendre pas ne li agree
1462 Car il y avoit souspecon
1463 Quant j'entendi ceste lecon
1464 Que l'en dit a penre vea
1465 Sachiez que point ne m'agrea
1466 Lors li dis que seurement
1467 Le preist car certainement
1468 Si n'avoit ens riens n'a letree
1469 Qu]ele s'estoit partout vantee
1470 Que il l'en peüst riens chaloir
1471 Ne qu'ele en peüst mains valoir
1472 Lors prist le dit si l'emporta
1473 De ce forment me conforta
1474 Petit me dura ceste joie
1475 Car en ce poi[n]t que je cuidoie
1476 Que le dit deüst retenir
1477 Je la vi vers moi revenir
1478 Car pas ne li avoit pleu
1479 Ce qu'ele avoit ou dit veü
1480 Si com j'oï puis bien entendu
1481 Car elle me vit le dit rendre
1482 Et me dist se je vous cuidasse
1483 Trouuer en vous mains m'i fiasse
1484 Ne ja le dit n'eusse pris
1485 Se je cuidasse que le pris
1486 D'un parisis eüst dedens
1487 Que mal de chief et mal de dens
1488 Puist aoir corps si po loiaus
1489 Com cil qui aimme por joiaus
1490 Ne nul par tel cas decevoir
1491 Ne me porroit sachiez de voir
1492 N'aiez en moi nule atendance
1493 Car sachiez que nule baance
1494 N'ai d'amer ne point de corage
1495 Si n'y avrez point d'avantage
1496 Non pas por ce que veille dire
1497 Que vous ne doiez bien souffire
1498 A miex vaillant que je ne soie
1499 Mais que d'amors amast la joie
1500 De moi si tost s'esloigna donques
1501 Que respondre ne la poi onques
1502 Lors m'esueillai de la fraor
1503 Que j'oï et de la grant paor
1504 Et si souvent me tressailli
1505 Qu'a po li cuers ne me failli
1506 .I. poy aprés non pas granment
1507 Ouuri les yex tout erranment
1508 Mais la deesse qui estoit
1509 Delez moi et m'amonnestoit
1510 Que li deisse apertement
1511 Por quoi si esfreement
1512 Estoie esueilliez orendroit
1513 Car sel savoit en nul endroit
1514 Li celoie tout sans mentir
1515 Bien m'en porroie repentir
1516 Si li dis toute m'aventure
1517 Et comment cele qui n'a cure
1518 Et tout mon penser mis avoie
1519 Me dist que ja ne seroit moie
1520 Si dist en dormant me sambla
1521 Dont mes corps de paor trambla
Folio 163v
1522 J'en sui dis je si effrees
1523 Et esmeüs com vous veez
1524 Si veilliez en moi conseil metre
1525 Car je ne m'en sai entremettre
1526 Et se vous conseil n'y metez
1527 D'esperance sui hors getez
1528 Et sui mors sans nul contredit
1529 Tenez je vous rent vostre dit
1530 Car jamais ne le bailleroie
1531 A cele a qui mes cuers s'otroie
1532 Je ne le puis jamais renir
1533 Que par la ne puis je venir
1534 A ce qu'en dormant ay veü
1535 Dont j'a paor et ay heu
1536 Car tout sans ce plus de martyre
1537 Ay que je ne porroie dire
1538 La deesse dist tu te doutes
1539 por noient iete jur les doutes
1540 Amans doit tous jors esperer
1541 Que son desir puist acheuer
1542 Encores ne soit il pas dignes
1543 Car c'est de bien amer .i. signes
1544 Et s'ainsi estoit que tu fusses
1545 Refusez et bien le sceüsses
1546 Si ne t'en dois tu pas retraire
1547 De bien dire ne de bien faire
1548 Oevre de sens et si t'avise
1549 Car se tu selonc ma deuise
1550 Veus ouvrer moult
1551 Grans auantages
1552 T'en vendra et as amans sages
1553 Par ce faire t'acomparas
1554 Enten que dist Adams d'Arras
1555 Ja ne sera loiaus drus
1556 Comment c'on les puis destraindre
1557 N'iert de servir recreus
1558 Ains ert tous jors en li graindre
1559 Lors neis que il va morir
1560 N'il ne l'ose regehir
1561 Et s'il avient qu'il li die
1562 Et sa dame l'escondie
1563 Cuer avra meillour
1564 D'endurer miex sa dolour
1565 Et miex li plaira la vie
1566 Et se fouir veulz desespoir
1567 Et demourer en bon espoir
1568 Et toy de grant ennui tenser
1569 Tu ne dois mie trop penser
1570 Au mal qui en amors eschiet
1571 Car a maint amant en meschiet
1572 Ains te doit adez souvenir
1573 Du grant bien qui en puet venir
1574 Et se tu y sens de l'amer
1575 Por ce ne dois laissier l'amer
1576 Car s'amors ne veult essaier
1577 Tu ne t'en dois pas esmoier
1578 Entent qu'Adam au cuer loial
1579 En dit en .i. sien chant royal.
1580 Qui adroit veult amors servir
1581 Et chanter de joieus talent
1582 Penser ne doit as maulz qu'il sent
1583 Mais au bien qui en puet ven[i]r
1584 Et fait a cuillir
1585 Sens et bonte et hardement
1586 Et les mauvais bons devenir
1587 Car chascuns bee en defenir
1588 Puis qu'il y tent.
1589 Qui s'esmaie por mal soffrir
1590 Ne qui prent garde a son torment
1591 Il ne puet amer loiaument
1592 Car com plus pense par loisir
1593 A son desir.
1594 Et plus li samble qu'il vient gent
1595 Et ainsi fait anoientir
1596 Lui et amors en deseruir
1597 Tout son jouvent
Folio 164r
1598 Adam en l'autre ver raconte
1599 Dont amor vient et comment monte
1600 Sa puissance par retenir
1601 Es cuers comment eulz maintenir
1602 Qui le service en soy maintiennent
1603 Cil qui la droite voie tiennent
1604 Droit ont se lor entente mise
1605 Y ont ce dit en ceste guise
1606 Li vers qui cy aprés dit a
1607 Adam d'Erras aint bon dit a.
1608 Par dire et par biaus ris oyr
1609 Et par ioli contenement
1610 Vostre amor au commencement
1611 Et ainsi se veulz porsuiuir
1612 Et esbaudir.
1613 Et esperer merci briement
1614 Encor n'y puist on avenir
1615 Ainsi veult amors maintenir
1616 Si douce gent
1617 Je li dis qu'ainsi maintenir
1618 Me voloie si qu'avenir
1619 Peusse parla a la joie
1620 Qu'amors as fins amans otroie
1621 Car grant talent m'en est venus
1622 Et si me sui je maintenus
1623 Et maintiens par amors hanter
1624 Ainsi com j'ai oÿ chanter
1625 En ce chant d'Adam que je dire
1626 Vous veil por mon estat descrire
1627 Grant deduit a en sauoureuse vie
1628 En bone amor honorer et servir
1629 Qui la maintient si qu'il doit sans boisdie
1630 Ains rent plus c'on ne puis deseruir
1631 Pour ce le serf. miex faire ne porroie
1632 Et se ja merci n'avoie.
1633 Quant tant auerai deservi
1634 Si me plaist il ma vie user ainsi
1635 Car je la fait pour la miex ensaignie
1636 C'on puist du cuer penser ne de veir.
1637 De tant appart a tous sa seignorie
1638 Qu'il est tous liez qui la puet conioir
1639 Hé; las je ne me metrai en sa voie
1640 Car poy parans y seroie
1641 Si n'ai qui ja soit por mi
1642 S'amors n'y est et pitié que j'en pri
1643 Ains de si loing de moy
1644 Ne fu choisie.
1645 Qu'a ses dous yex amoreus entr'ouurir
1646 Ne fusse emplis
1647 De joie raemplie
1648 De loiauté d'amor et de desir
1649 D'un seul vëoir ai si grant joie
1650 Que ce seroit se j'ooie
1651 Qu'ele m'apelast ami
1652 Diex je ne vous demant autre merci
1653 J'ai mainte fois laissie la compaignie
1654 Quant bone amor me daignoit
1655 Souvenir.
1656 Por deliter en pensee enuoisie
1657 En ramembrant sa valor a loisir
1658 Et lors qu'estoie esseules m'enfermoie
1659 Lors par samblant me cuidoie
1660 Delez li tout esbahi
1661 Ainsi mes maus a la fois m'entr'oubli.
1662 Se je m'osoie contre li retorner
1663 Quant je l'encontre en la voie au venir
1664 Tant qu'ele fust de mes yex convoie
1665 Avec mon cuer qu'ele a sans departir
1666 Trop doucement apaiez m'entendroie
1667 Mais por rie[n]s n'oseroie
1668 Avoir le cuer si hardi
1669 Tant aing et crieng
1670 L'amor qui vient de li.
1671 Quant la deesse et les Diex m'orent
1672 Escoute por ce que il sorent
1673 Comment vers eulz me contenoie
Folio 164v
1674 Et quel fiance en eulz avoie
1675 Me distrent il que sans doutance
1676 J'auroie par eulz alleiance
1677 Par tel couvent que je tenisse
1678 Et qu'a percoiure m'en emplisse
1679 Ce que ce chaut avoie dit
1680 Je respondi sans contredit
1681 Voloie tout lor voloir faire
1682 Car riens tant ne me porroit plaire
1683 Quant j'oï ce dit lors apelerent
1684 Les .iii. qui leens m'amenerent
1685 Ce fu pensers et esperance
1686 Et souuenirs qui des m'enfance
1687 Moi et mes ouures connoissoient
1688 Et si lor distrent qu'il voloient
1689 Qu'a lors pooirs me confortassent
1690 Et de moi garde se donnassent
1691 Ore et tous jors tant que u'auroie
1692 Ce qui me doit muer en joie.
1693 Il dient que moult le voloient
1694 Et que volentiers le feroient
1695 Li Diex me remis a parole
1696 Qui bien en pot tenir escole
1697 Qui sages et soubtilz estoit
1698 Et par teulz mos m'amonnestoit
1699 Amis ne soies pas de ceulz
1700 Qui sont faintis et pereceus
1701 Car cil qui ont en ce lor cure
1702 N'ont en amors point de droiture
1703 Mais pren bon cuer et hardement
1704 Car souffert as plus longuement
1705 C'on ne doit tenir a outrage
1706 S'a cele moustres ton corage
1707 D'ore en avant qui as ta vie
1708 Et corps et tout en sa baillie
1709 Tout rabatu et tout compte
1710 Qui m'aimme il me fait bonte
1711 Si li pues bien saches de voir
1712 Se tu l'aimmes ramentevoir
1713 Car bonté faite et non sceue
1714 Si est aussi comme perdue
1715 De trestout ton pooir t'acointe
1716 De tous ceulz dont elle est acointe
1717 Si qu'en lor vmbre a la fie
1718 Puissiez estre en sa compaignie
1719 C'est saches tu grant alleiance
1720 D'avoir ou l'en aimme acointance
1721 Car quant on a ou lieu afaire
1722 Ou cele c'on aimme repaire
1723 Ou a cause de ceulz mander
1724 C'on connoit et d'eulz demander
1725 Tant que cele sera venue
1726 Dont on desirre la venue
1727 Ainsi puet on s'amor couvrir
1728 Qui ne fait mie a descouurir
1729 Por ce le te commant a faire
1730 Se tu veulz de riens a moi plaire
1731 Puis li porras dire ou mander
1732 Que le puet a toi commander
1733 Car tous es siens et sans mesprendre
1734 Puet le tien allouer et prendre
1735 Comme le sien p[ro]pre chatel
1736 Ne ja ne te trouuera tel
1737 Que vers li de riens te deffendes
1738 Ce que tu tous jors mais entendes
1739 A faire sa volenté toute
1740 De ce ne soies pas en doute
1741 Il se fait mauvais delaier
1742 De son profit faire essaier
1743 Ne met ce donques en defoys
1744 Qui j'ay or dir e autre fois
1745 Mais tout ainsi comme je l'ay
1746 Dit a toy fais le sans delay
1747 Essayes sots et si commence
1748 Et se de ce veulz la science
1749 Bien en cercher et bien enquerre
Folio 165r
1750 Comment on doit d'amors requerre
1751 Chascune selonc sa noblece
1752 Selonc l'estat de sa hautece
1753 Et selonc la condition.
1754 Se tu y as entencion.
1755 Tout ce trouveras a delivre
1756 Mais que tu veilles lire ou livre
1757 C'on apele en francois Gautier
1758 Miex ens qu'en bible n'en psaltier
1759 Et celui livre translata
1760 Cilz qui onques jor ne flata
1761 Ne blandist homme que je sache
1762 Ce fu meste Diex de la vache
1763 A chascun plaisoit son afaire
1764 Tant estoit dous et debonaire
1765 Je ne t'en ay dit que le voir
1766 Si n'estoit mie a decevoir
1767 Ne par promesse ne pardon
1768 Mors est or ait s'ame pardon
1769 Et quant ainsi fait aueras
1770 Au plus tost que tu troueras
1771 La panthere qui est si douce.
1772 Qui toutes tes doleurs adouce
1773 Quant delez li te pues seoir
1774 .I. grant ou poi la pues vëoir
1775 Si pren en ton cuer hardement
1776 Et li di tout apertement
1777 Comment por li vis a mortire
1778 Apres ce li porras escrire
1779 Et tant seurement mander
1780 Ce que je te veil commander
1781 Car ce n'est se bien
1782 Mais sans faille
1783 A tant de dens ma main me baille
1784 .I. dit qu'il prist en s'aumosniere
1785 Et dist li dis en tel maniere
1786 Dame fleurs de celes en uie
1787 Dame sans mal et sans envie
1788 Et sans vice qui vous empire.
1789 Cilz qui de mauvais point e[m] pire.
1790 Va tous les jors por vous amer
1791 Tant sent le mal d'amors amer
1792 Vous salue con fins amis
1793 Qui tout entierement a mis.
1794 Cuer. et corps en vostre baillie
1795 Por paine qui l'en soit baillie
1796 N'en retraira son cuer sachiez
1797 Ja par lui n'en sera sachiez
1798 Car vous estes tous ses confors
1799 Et si vous di bien m'en fais fors
1800 Les mauls d'amer tous jors en dure
1801 Et comme il est entrez en dure
1802 Vie. por vous le sai de voir
1803 Que bien feriez vo devoir
1804 De lui amenuisier sa paine
1805 Car sachiez bien que il se paine
1806 Au miex que il puet de servir
1807 Veil por vostre amor deseruir
1808 Corps qui est du tou bone ment
1809 Por cele doit on bonement
1810 Quant il se complaint alleger
1811 Et celui consent alleger
1812 Doit on lessier mesaise avoir
1813 Non ne deuroit por mal avoir
1814 Ce m'est vis releuer de mort
1815 Car il est dignes de deport
1816 Le fait se bien sui apensez
1817 Selonc les maulz qu'il a pensez
1818 Pour ce que j'ai de vostre ayde
1819 Mestier pri je que moy aide
1820 Amor qui aus biens est aidans
1821 Car plus vous aing que plus n'ay d'ans
1822 Tant estes de douce maniere
1823 Et de bien faire coustumiere
1824 S'ai bien de s'aide mestre
1825 Car mis me sui a tel mestre
1826 Car je n'ai pas toutes mes aaises
1827 Auant en ay des grans mesaises
Folio 165v
1828 Et moult en sui entrez en grans
1829 Pensees bien doi estre engrans
1830 De moi sagement maintenir
1831 Car je voi vostre main tenir
1832 Ma vie et ma mort tout ensamble
1833 Si faite ce qu'il
1834 Vous ensamble
1835 Dame qu'il appartie[n]t a faire
1836 D'ame qui est de tel afaire
1837 Se je vous aing por ce pis estre
1838 Ne m'en doit por tant de mon estre
1839 Vous fai cest escript a message
1840 Car bon fait enuoier mes sage
1841 Douce dame dont j'atent joie
1842 Humiliez vous tant que j'oie
1843 Vostre bouche parler a moy
1844 Je vous en pri et por ame
1845 Me receuez ma douce dame
1846 A cui sui tous de corps et d'ame
1847 Car nule riens tant ne desir
1848 Ains sont tourne
1849 Tuit my desir
1850 A faire tout vostre voloir
1851 Car riens ne porroie valoir
1852 Que ce qu'il vous doie desplaire
1853 Et ce ne fait mie a desplaire
1854 Ce m'est vis se vous servi ay
1855 Mis mon cuer si vous servirai
1856 De cuer loiaument sans retraire
1857 Por les biens qu'ai oÿ retraire
1858 De vous frans cuers
1859 En douce chiere
1860 Mais trop m'en ert rendue chiere
1861 Malement s'il ne vous en prent
1862 Pitie et amors qui emprent
1863 Les fais des amans et lor oevre
1864 Par sa pitié por moy n'i oevre
1865 Et s'il est ainsi que le faille
1866 A vostre amor onques mais faille
1867 Ne fu aussi chier comparee
1868 Car nule dolor comparee
1869 Ne porroit lors estre a la moie
1870 Mais n'est dame se tant l'amoie
1871 Qu'ele n'eüst ce croi de my
1872 Pitie. car je jor ne demi
1873 N'oÿ de repos ce m'est avis
1874 Ni en vostre corps qui a vis
1875 Si dous ne doit trouver deffaut
1876 De merci et s'a moy deffaut
1877 Sans raencon sui mis a mort
1878 Et par tele aventure a mort
1879 Maint loial ami desespoir
1880 Dont s'il est ainsi desespoir
1881 De joie avoir sui hors boutez
1882 Mais par amors ne me boutez
1883 Dame de si crueuse lance
1884 Que plus de mal que j'ai me lance
1885 Car contraire m'est si Fortune
1886 Que je croi c'onques si fort une
1887 Foys. ne fu a nul auenue
1888 Comme a moy estre auenue
1889 Por chose que j'aie meffait
1890 Car de riens ne m'y ay meffait
1891 Vers amors ja n'i ferai chose
1892 De quoi nulz hons loias me chose
1893 Si me getez de ces perilz
1894 Ou tantost seroie peris
1895 Se longuement telz max avoie
1896 Car esperance qui avoie
1897 Les vrais amans me fait penser
1898 Que puis qu'en vous sont mi penser
1899 Dont tout ay tou sans decevoir
1900 Et ore en ay mal di je voir
Folio 166r
1901 En aucun temps avrai deport
1902 En ce moult souvent me deport
1903 Et c'en que je mon temps emploie
1904 En lieu si gent si m'y emploiy
1905 Tele amor maintenant en tant
1906 Vif et vivrai d'ore en avant
1907 Jusqu'a la mort ma vie fine
1908 Si vous pri douce dame fine
1909 Merci de coy s'atente est garde
1910 De coy espoir en vous se garde
1911 Quant li Diex m'ot ce don done
1912 Il m'a tantost araisonne
1913 Amis que me diras tu ore
1914 As tu tant hardement encore
1915 Que ta dame baillier osasses
1916 Cest escript ou li enuoiasses
1917 En tant hardement tu n'as mie
1918 Au mai[n]s a une seue amie
1919 La dois baillier comment qu'il aille
1920 Seure qui a li la baille
1921 Ou qui par devant li li lise
1922 Et li die cilz n'a pas mise
1923 S'entencion a fausses bourdes
1924 Ains a mis ses pensees toutes
1925 En amer a mon escient
1926 N'il ne fist onques por noient
1927 Ce dit et si sachiez de voir
1928 Qu'il n'aimme pas pour decevoir
1929 N'il n'en n'a mie le renon
1930 Lors si porrez dire le non
1931 De vous si porra bien entendre
1932 Qu'a faire ce feïst emprendre.
1933 Amors qui si forment t'apresse
1934 Que ce nuit ne de jor ne cesse
1935 Et por ce porra bien penser
1936 Que de ce mal te puet tenser
1937 Et se bien savoit ton corage
1938 Ja ne te seroit si sauvage
1939 La bele se le cuer a fin
1940 Que miex ne t'en fust en la fin
1941 Je li dist que je lo feroie
1942 Moult tres volentiers
1943 Mais en mon cuer
1944 Tant ne sent mie
1945 De hardement que je li die
1946 Ne qu'a autres savoir le face
1947 Qu'en ce faisant ne me mefface
1948 Celer le doi se savoir veil
1949 Car li mesdisant a lor duel
1950 Maniere de mesdire auroient
1951 Se eulz de riens aperceuoient
1952 Qu'aucune chose dit eusse
1953 Que celer et taire deusse
1954 Trop miex ma vie ainsi user
1955 Que moy par ma jangle encuser
1956 Assez de corrous me venist
1957 Car de jangler nulz biens n'en ist
1958 Si atendrai merci ainsi
1959 De la panthere que j'aing si
1960 Que de li ne me puis retraire
1961 Car autre chose n'en os faire
1962 Li Diex dist autre conseil pre[n]dre
1963 Te convient et aillors entendre
1964 Et toute autre voie tenir
1965 Se tu veulz a merci venir
1966 Et puis que tu as refusees
1967 Les voies que je t'ai moustrees
1968 Je n'y vois plus voie nis une
1969 Fors que la voie de Fortune.
1970 Et cele voie est trop douteuse
Folio 166v
1971 A tenir et trop perilleuse
1972 Car Fortune si est trop dure
1973 A la fois et triste et obscure
1974 Felonnesse orgueilleuse et fiere
1975 Et a la fois d'autre maniere
1976 Large cortoise et acueillans
1977 Douce piteuse et bien veillans
1978 Puis que choses que j'aie dites
1979 Ne veult nulz tenir s'en soit quites
1980 Si pren de Fortune la voie
1981 C'est li plus biaus tours que g'i voie
1982 Car tant ne te savras lasser
1983 Que par aillours puisses passer
1984 Vas donques et si t'apareilles
1985 Et a ton profit faire veilles
1986 Li .iii. qui t'ont fait compaignie
1987 Au besoi[n]g ne te faudront mie
1988 Mais voies et par sentiers
1989 T'acompaigneront volentiers
1990 Car je le veil et le commant
1991 Lors dis sire a vostre commant
1992 De cy donques me partirai
1993 Droit a Fortune m'en irai
1994 A tant d'ileques me depart
1995 Et li Diex d'amours d'autre part
1996 Si nous meismes a la voie
1997 Je et li .iii. que je menoie
1998 Que li Diex en ma compaignie
1999 Me bailla par sa cortoisie
2000 Tant alames par nos jornees
2001 Par montaignes et par valees
2002 Qu'en assez petite saison
2003 Venismes droit en la maison
2004 De Fortune la venimeuse
2005 Moult est sa maison perilleuse
2006 Car elle siet toute sus glace
2007 Qui dure que temps que il face
2008 Car moult belle est d'une p[ar]artie
2009 Et noble et de tous biens garnie
2010 De l'autre partie si gaste
2011 Que nul n'i a ne pain ne paste
2012 Et est ruineuse et deserte
2013 Si despeciee si desperte
2014 Que s'il espartist plus ou vente
2015 Nulz ne m'est la qui ne s'en sente
2016 Car la pluie. vens et espars
2017 Se fierent ens de toutes pars
2018 De cele maison a l'entree
2019 Estoit Fortune l'auuglee
2020 Por les trespassans recevoir
2021 Car il convient sachiez de voir
2022 Que chascuns y soit hostelez
2023 Car il n'a nul hostel delez
2024 Que l'en peüst pas herbergier
2025 .I. vaillant homme u un bergier
2026 .II. seigneurs a en la maison
2027 Qui n'i sont mie de raison
2028 Ains usent de lor volenté
2029 Et a de gent chascuns plenté
2030 Li uns des .ii. a non eurs
2031 Et li autres a non meseurs
2032 Eurs si garde la partie
2033 Qui est plus bele et plus garnie
2034 Et cele a non prosperitez
2035 Et l'autre a non aduersitez
2036 Qui est orde et de lair afaire
2037 En ce le meisme repaire
2038 Li uns a l'autre adés guerroie
2039 Et ce qu'il pert li cos et proie
2040 Tele est lor coustume commune
Folio 167r
2041 Mais il couvent que de Fortune
2042 Leur soit l'autorite baillie
2043 Car quant Fortune est corroucie
2044 Meseur puet sus eur prendre
2045 Que cilz ne s'en ose deffendre
2046 Et quant Fortune est apaisie
2047 Eus a lors la seignorie
2048 Si met de tez en grant noblece
2049 Et meseurs tient en destrece
2050 Quant nous venismes a la porte
2051 Fortine qui nul ne deporte
2052 Estoit a ce point corroucie
2053 Si nous fist metre en sa partie
2054 D'auersite par meseur
2055 Car je n'en fui pas asseur
2056 Ains y ai a soffrir assez
2057 Auant que li temps fust passez
2058 Que de la partir me peusse
2059 Et encor plus souffert eusse
2060 Mais souuenirs et esperance
2061 Et dous pensers qui aleiance
2062 Et moult grant confort me faisoient
2063 Car quant a meschief me veoient
2064 Il disoient soiez seurs
2065 Qu'en ce soustenrra eurs
2066 Es tourmens fui la longuement
2067 C'onques n'oÿ autre allegement
2068 Ne por prier ne por promettre
2069 Je ne m'en pooit hors mettre
2070 De ces meschiez de cele ardure
2071 .I. jor avint par aventure
2072 Que vi une dame senee
2073 Cheuauchier par une contree
2074 S'apella une damoisele
2075 Bone volenté ot non cele
2076 Nul bien ne savroit escondire
2077 A Fortune l'enuoia dire
2078 Qu'en son hostel le jor seroit
2079 Et leens se herbergieroit
2080 Quant bone volenté la vint
2081 Trestout ainsi comme il avint
2082 Que Fortune fu apaisie
2083 Qui estoit devant corroucie
2084 Assez tost aprés revint grace
2085 Lors n'i a celi qui ne face
2086 A grace et a sa gent quant joie
2087 Fortune meismes la conuoie
2088 Et eurs en prosperite
2089 Qui fu de grant auctorite
2090 Car tout puet faire son talent
2091 Quant Fortune est sans mal talent
2092 Et quant il se vit en possance
2093 Il se volt sans faire arrestance
2094 Tantost vers adversité traire
2095 Por faire a meseeur contraire
2096 Si com il estoit ou venir
2097 Il vit delez moi soruenir
2098 Et li demanda doucement
2099 Di moi dont sans delaiement
2100 Amis qui t'a amene ca
2101 Et qui ceens toy adreca
2102 Souuenirs dist sachiez sans doute
2103 Que Fortune qui ne voit goute
2104 Me mist cy et ma compaignie
2105 Pieca qu'ele estoit corroucie
2106 Et puis nous a tous jors esté
2107 Et par yuer et par esté
2108 Li issirs est cy deueez
2109 Cilz autres que vous cy veez
2110 Est uns tres fins loiax amans
2111 Aussi fermes c'uns dyamans
2112 Et dous pensers et esperance
2113 Si sommes cy par sa cointance
2114 Et por merci querre venu
Folio 167v
2115 Car nous somes a li tenu
2116 Que nous ne la poons faillir
2117 Quiconques le veille assaillir
2118 Je vous ai le voir raconte
2119 Si vous pri par vostre bonte
2120 Et par vostre grant cortoisie
2121 Que vous moi et ma compaignie
2122 D'auersite hors nous menez
2123 Et cest commant en moy prenez
2124 Car il est loiaus et entiers
2125 Eur respondi volentiers
2126 Veil ta requeste recevoir
2127 Et si vous veil sachiez de voir
2128 Dedens prosperite conduire
2129 Aussi sui je venus por nuire
2130 A meseeur et lui mal faire
2131 Por ce que volentiers contraire
2132 Me fait quant il pooir en a.
2133 A tant meseur emmena
2134 Quant nous venimes en la place
2135 De prosperite devant grace
2136 Eurs grace si corte tint
2137 Qu'en son servie me retint
2138 Bone volenté l'en pria
2139 Por ce plus tost si otroia
2140 Tout en ce poi[n] par verité
2141 Chiez Fortune en prosperite
2142 Ou mainte bele herberge a
2143 O nous vint et se herberia
2144 Avec lui merci emmenoit
2145 Sa chiere fille et si menoit
2146 Avec lui la douce pa[n]there
2147 Qui tant estoit et douce et clere
2148 Qui de biauté voir enlumine
2149 Tous les liex ou elle chemine
2150 Quant leens furent descendues
2151 De tous furent bien retenues
2152 Que en prosperite estoient
2153 Et moult grant feste lor faisoient
2154 Mais quant la pa[n]there venir
2155 Vi je ne me soi retenir
2156 Ains perdi toute contenance
2157 Lors me conforta esperance
2158 Et dit prens cuer et t'esuertue
2159 Et puis que pitiez est venue
2160 Tu aras ce que tu conuoites
2161 Se tu vers grace tant esploies
2162 Que por toi le veille proier
2163 Que merci li veille otroier
2164 Lors priai tant ma dame grace
2165 Que tantost sans querre espera[n]ce
2166 Et sans querir nule autre aloingne
2167 Pregne pitié de ma besoigne
2168 Et trestuit cil qui la estoient
2169 Aveques grace l'en prioient
2170 Et lors dist pitiez ce me samble
2171 Et vous estes tel gent ensamble
2172 Et estes de si bon afaire
2173 Que ne vous sauriez meffaire
2174 Et qui ne me feriez requeste
2175 Que ne fust et bone et honeste
2176 Et por ce point ne me descorde
2177 Se la panthere si descorde
2178 Mais sachiez bien sans son acort
2179 A ce faire pas ne m'acort
2180 Car sachiez en nule maniere
2181 Ne quier merci ma fille chiere
2182 A home qui vive octroier
2183 Por prier ne por loier
2184 Mais por vostre amor tant ferai
2185 Que volentiers l'en prierai
2186 Et se vous aussi l'en proiez
2187 Et eur prier en feriez
2188 Et bone volenté la gente
Folio 168r
2189 Qui a tous biens faire est presente
2190 Et sachiez nous n'y
2191 Faudrons mie
2192 Se bonne volenté l'en prie
2193 Lors prendent sans point detrier
2194 Entr'eulz la panthere a prier
2195 Qu'en si grant amor me recueille
2196 Que merci otroier me veille
2197 Quant vit que chascuns l'en pria
2198 Vers moy .i. poy s'umilia
2199 Et me dist ainsi la panther
2200 Puis que pitié qui est ma mere
2201 Le veult je ne le desuouldray
2202 Ains le veil et adez vouldray
2203 Quant bone volentez l'en prie
2204 Et ma grace et sa compaignie
2205 Que nulz ne devroit refuser
2206 Je ne m'en sauroie escuser
2207 Car je croi qu'il ne prieroient
2208 Por nului se il ne savoient
2209 Que il fust dignes de la chose
2210 Por ce refuser ne lor ose
2211 Dont pas ne vous devez doloir
2212 En tout bien et en toute honor
2213 Sans penser mal ne deshonor
2214 Je vous otroi moi et merci
2215 Lors dis et je vous en merci
2216 Douce dame tant com je puis
2217 Car aillors n'oÿ pensee puis
2218 Que je vous vi premierement
2219 Qu'a vous amer entierement
2220 Et que m'amor vous peüst plaire
2221 Douce panther debonnaire
2222 Por ce cuer et corps vous otroi
2223 Car vous avez par vostre otroi
2224 Enuoie si parfaite joie
2225 Que plus grant avoir ne porroie
2226 Il n'est nulz hons qui eüst onques
2227 Si grant joie com ioi adonques
2228 Et ce fu tout droit sus le jor
2229 A tant la gaite sans sejor
2230 Qui assés prés ert de m'oreille
2231 Corne le jour et je m'esveille
2232 Quant je me trouvai esueillie
2233 Je me senti si traveillie
2234 De ce que je souffert avoie
2235 En mon dormant quant je sonjoie
2236 Si comencai a reuerchier
2237 Tout mon songe et a encerchier
2238 Quant j'oï bien encerchie mon so[n]ge
2239 Riens n'y trouuay
2240 Qui fust m'ensonge
2241 Fors tant conques merci trouver
2242 Ne poy tant peusse esprouuer
2243 Mon cuer par loingn ouvrer
2244 Mais en espoir de recouvrer
2245 Tous jors loiaument ouuerai
2246 Ne sai se ja recouuerray
2247 Ne vanter ne me puis je mie
2248 C'onques a nul jor de ma vie
2249 Trouuasse ne samblant ne chiere
2250 En ma tres douce dame chiere
2251 Dont merci esperer deusse
2252 Combien que pener me peusse
2253 Et si n'en puis ne veil retraire
2254 Ne por ennui ne por contraire
2255 Qu'aye souffert dusques a ore
2256 Ne que j'aie a soffrir encore
2257 Car miex emploier ne porroie
2258 Mon temps en dame que je voie
2259 Qu'aing miex l'anguir por li par m'ame
2260 Que ioir de nule autre dame
2261 Ainsi vivrai en son dangier
2262 Que li por nul autre dangier
2263 N'onques n'oÿ autre volenté
2264 Tant eusse de mal plenté
Folio 168v
2265 Ne ja n'avrai jor de ma vie
2266 S'en di ceste chancon iolie
2267 Qu'amors de nouvel me fait faire
2268 Pour ami ne por contraire
2269 Ne pour mal souffrir
2270 Ne me puis d'ame tenir
2271 Mon cuer ne m'en lait retraire
2272 Por ennui[er] ne por contraire
2273 Ains me fait tant
2274 Les griez maulz plaire
2275 Qu'amors fait venir
2276 Qu'il me font dire et entir
2277 Pour ennuyer [ne por contraire]
2278 Ne ja ne m'en quier meffaire
2279 Pour ennui ne por contraire
2280 Et puis que je veil tant faire
2281 D'amors le plaisir
2282 Bien puis dire sans mentir
2283 Pour ennuyer [ne por contraire]
2284 Car nulz cuers de bon afaire
2285 Pour ennuy[er ne por contraire]
2286 Ne se doit nis por mort traire
2287 D'amors departir
2288 Mais dire au point de morir
2289 Pour ennuy[er ne por contraire]
2290 Cy aprés veil la raison rendre
2291 Qui ma fait a ce faire entendre
2292 Dont la raison appertement
2293 Por coy aymme si faitement
2294 Ceste chanconnete enuoie
2295 Qui cy ensuit le senefie
2296 Biautez bontez douce chiere
2297 Sens et auenans maniere
2298 Et grace m'ont si conquis
2299 En moustrant dame de pris
2300 Soudainnement
2301 A li servir me rent
2302 Pris outreement
2303 Ne ja de mon cuer mis arrieres
2304 N'en iere. Car [se] cetains iere
2305 Que ja jour ne fusse oys
2306 Et si est il du tout mis
2307 Si fermement qu'a li servir [me rent pris outreement]
2308 Mais ja se Dieu plest si fiere
2309 Niert vers moi ma dame chiere
2310 Que de li soie escondis
2311 Car de lui amer espris
2312 Sui si forment;
2313 Qu'a li servir [me rent pris outreement].
2314 J'ai dit la raison et le dit
2315 En ceste chancon qui me fait
2316 Amer si loiaument sans fraindre
2317 Que ne m'en puis ne veil refraindre
2318 Et por ce qu'au commencement
2319 Quant regardai premierement
2320 Ma dame. des biens y vi tant
2321 Si m'en aloie delitant
2322 Qu'amors me dona esperance
2323 Que de li amoie aleiance
2324 Et por ce lors souvent chantoie
2325 Et plus gays et iolis estoie
2326 Et lors fis je premierement
2327 A l'aide tant seulement
2328 De bone amor qui me mestrie
2329 Iceste balade enuoisie
2330 Se nulz cuers por bien chanter
2331 Avoit volenté iolie
2332 Ne corage de chanter
2333 Faillir n'y devroie mie
2334 Car j'aing dame bien garnie
2335 De sens et devoir
2336 S'en merci amour
2337 J'ai mis sans ja desseruer
2338 Cuer et corps en sa baillie
2339 Car bele est a regarder
2340 Cortoise et bien ensaignie
Folio 169r
2341 Et trop plus que je ne die
2342 Plaine de valour
2343 S'en merci amour
2344 Au commencier me maintenoie
2345 Ainsi por ce que je cuidoie
2346 En aucun temps avoir amie
2347 Cele que j'avoie choisie
2348 Et si cuidoie vraiement
2349 Que ceulz qui aimment bonement
2350 Maus ne contraire ne leuast
2351 Que de desir plus le greuast
2352 Mais cuidiers qui souvent esluse
2353 Assez de gens et les amuse
2354 Mais bien d'un autre ieu joue
2355 Non pas jone mes mesioue
2356 Et trop malement deceu
2357 Si comme le l'ai bien veü
2358 Car cele a cui je m'atendoie
2359 Se met tous jors hors de la voie
2360 Et me fait dont j'ai si grant ire
2361 Qu'a paine le porroie dire
2362 S'en joue je vous ay couvent
2363 Et chant mains que ne seul souvent
2364 Car je que esper soloie
2365 Mercy ne say que faire doie
2366 Pour estat qui ainsi cha[n]cele
2367 S'en ay fait ceste baladele
2368 Amis muez a contraire
2369 M'a si mue mon afaire
2370 Qu'il m'a fait longuement tant
2371 De chanter et de chant faire
2372 Car la bele au dous viaire
2373 Que j'aing deseruir mon afaire
2374 N'est ce assez pour moy retraire
2375 De chanter et de chant faire
2376 Bone amor veilliez atraire
2377 Tant que je puisse a li plaire
2378 Si arai bon examplaire
2379 De chanter et de chant faire.
2380 Et quant ma dame
2381 Ainsi m'eslonge
2382 Je n'en puis se je resoigne
2383 Et se je me doubt et esmaie
2384 Que je de li ja merci n'aie
2385 Et plus por ce me doi doubter
2386 Qu'ele oïr ne veult n'escouter
2387 Ni entendre en nule maniere
2388 Chant que je face ne priere
2389 Se criem qu'ele n'ait autre ami
2390 Por ce qu'ele n'entent a mi
2391 Dont j'ai au cuer joie et pesance
2392 Tele que pour cele doubtance
2393 Je demeur hors de son pays
2394 Car je seroie trop trahis
2395 Se je devant mes yex veoie
2396 Qu'autres de moy en eüst joie
2397 S'en sui de chanter achoisiez
2398 Et plus mas et mai[n]s enuoisiez
2399 Mais amors tele vilennie
2400 A vrai amant ne feront mie
2401 Por ce des orés mais serai
2402 Mains tristes si m'enuoiserai
2403 Et chanterai comment qu'il aille
2404 Car qui sert dame qui riens vaille
2405 Envis ne puet estre peris
2406 Qu'en aucun temps ne soit meris
2407 Ca m'a de chanter esmeü
2408 S'en ay fait miex que j'ai peu
2409 Ceste chancon toute nouvele
2410 Qui mon estat moustre et reuele
2411 Et le passe et celui d'ore
2412 Et celi avenir encore
2413 J'ay esté chantans iolis et gays
2414 Mais venue est l'eure
2415 Dont jadis telz rit au main
2416 Qui au soir pleure
Folio 169v
2417 Si n'a en moy ne ieu ne ris
2418 Car je ne puis estre oys
2419 De cele qui a m'amor
2420 Por qui je sui sans sejour
2421 En pensee nuit et jor
2422 Pour ce sui tristes pensis
2423 Et mas por la demeure
2424 Que je fais hors du pays
2425 Ou cele qui j'aing demeure
2426 Que je fais hors du pays
2427 Ou cele qui j'aing demeure
2428 Et si en aing miex estre eschis
2429 Que devant mes yex saisis
2430 Fust uns autres de l'onour
2431 Por qui je sui sans partir
2432 Car s'il auenoit que uns
2433 veïst .i. autre au desseure
2434 De l'amor dont sui espris
2435 Je ne voie qui me sequeure
2436 Que ne fusse mal baillis
2437 Car estre ne puis garie
2438 Autrement de la dolour
2439 Por qui [je sui sans partir]
2440 Mais amors qui ses subges
2441 Essauce auance et honeure
2442 Soufferroit je croiy enuis
2443 Puis qu'a li servir labeure
2444 Mes corps en fais et en dis
2445 Que je fusse ainsi trais
2446 Qu'a cele n'aie retour.
2447 Pour qui [je sui sans partir].
2448 Et si sui je bien si pris
2449 Que por mal qui sus me queure
2450 Ne serai ja si repas
2451 Que je tant me deshoneure
2452 Se d'amer soie faintis
2453 Si ferai a cele amis
2454 Sans penser nul vilain tour
2455 Pour qui me sui sans sejor
2456 Se je sui de ma dame pris
2457 Je n'en doi pas estre repris
2458 Quant elle est por bone tenue
2459 De tex dont elle est congneue
2460 Car j'oÿ dire en prouerbe
2461 Com doit a son oeil la bone herbe
2462 Touchier quant on la puet trouver
2463 Et par ce pues tu bien prouuer
2464 Com doit aussi les cuers loiax
2465 Chier tenir qui n'est desloiaus
2466 Et s'ai oÿ tous jors retraire
2467 Qu'en corps tout humble
2468 Et debonnaire
2469 Doit par raison bon cuer avoir
2470 Si c'on puet par dehors vëoir
2471 Por quoi les personnes sont dignes
2472 D'amor ou l'en trueve ces signes
2473 J'ai la bone herbe recouurees
2474 Et jusqu'a mes yex menee
2475 Si dirai en quel maniere
2476 En regardant la douce chiere
2477 De ma dame et son dous viaire
2478 Que maint grief mal
2479 El mal el m'a fait traire
2480 Mais sa tres bele contenance
2481 Est ce m'est vis signifiance
2482 De cuer piteus ce me conforte
2483 Tant que mon mal plus bel s'emporte
2484 Car il m'est vis que la biautez
2485 Norrit pitié et loiauté
2486 Dont ne me doie nulz reprendre
2487 S'a li amer je veil entendre.
2488 Et se de li sai mains vaillans
2489 Por ce n'y doi estre faillans
2490 Car humilitez fait sambler
2491 Les cuers qu'amors fait assambler
2492 Quant pitiez s'en melle samblans
Folio 170r
2493 So com dist Adam de la Hale
2494 Qui onques n'ot pensee male
2495 Vers amor ne cuer desloial
2496 En ce ver d'un sien chant royal
2497 Fins cuers qui vostre deuiant n'a
2498 Pas meschoisi.
2499 Mais nulz ne s'i appartient
2500 Non pour quant je di
2501 Que humilité sans nul si fait sambler
2502 Quant amors se veult meller
2503 Chascun onny
2504 Pour ce veil sans plus seiorner
2505 Devers ma dame et retourner
2506 En qui j'ai m'entente mise
2507 Et li proier en ceste guise
2508 Douce dame courtoise et bele
2509 Et bone vous qui estes tele.
2510 Qui est l'erbe que j'ai choisie
2511 Que j'ai a mes yex atouchie
2512 Veilliez moy moustrer la fra[n]chise
2513 Qu'il samble que nature ait mise
2514 En vous fournir finablement
2515 Et moi qui vous pri humblement
2516 Retenir dame a vous amer
2517 Car nulz ne vous devroit blasmer
2518 Se vous de moy avez pité
2519 Par vostre grant humilité
2520 Car dame douce et gracieuse
2521 Doit par raison estre piteuse
2522 Et por ce plus hardiement
2523 Vous pri que vous allegement
2524 De merci me veilliez donner
2525 Et si me veilliez pardonner
2526 Quant si grant chose osai emprendre
2527 Com de vostre merci atendre
2528 Dame gentilz et debonnaire
2529 Car grant amor le me fait faire
2530 Et se de vous amez estoie
2531 Je seroie en pleniere joie
2532 Et seroient tous assouui
2533 Ce que dedens mon songe vi
2534 Li quelz ne puet estre averez
2535 Devant qu'ainsi fait averez
2536 Si vous pri que vous veille plaire
2537 Que vous veilliez tant por moi faire
2538 Que j'ai fait en vostre fiance
2539 Si me fera grant allejance
2540 Por moi allegier mon martyre
2541 Que je vous veil cest rondel dire
2542 Que j'ai fait en vostre fiance
2543 Si me fera grant alleiance
2544 Soiez liez et menez joie amis
2545 Qu'amours m'en prie
2546 D'alegier vostre dolour
2547 Fins cuers a qui je m'otroie
2548 Soies liez.
2549 Car por ce que je vouldroie
2550 Tous jors vos bons se je pooie
2551 Acomplir sauve m'onnour
2552 Vous di je par grant doucour
2553 Soiez liez.
2554 Et se de vous oÿ l'avoie
2555 Cest autre fait que je diroie
2556 J'ay en commandement
2557 D'estre liez.
2558 Si le serai enchantant
2559 De loial cuer gay
2560 Son me demande comment
2561 Ne pourquoie je respondrai
2562 D'estre liez si le dirai
2563 Et tout ce m'est bel et gay
2564 Que cele ou mon cuer m'as ay
2565 Commande. Et por ce dirai.
2566 J'ay commandement [D'estre liez Si le serai enchantant De loial cuer gay].
2567 Car tres moult grant joie auroie
2568 Douce dame se pooie
2569 Faire chose qui vous pleüst.
Folio 170v
2570 Combien que couster me deüst.
2571 Fust du corps fust de l'avoir
2572 Ne que mal que je puisse avoir
2573 Ne ferai plainte ne clamor
2574 Ains en merci vous et amour
2575 Quant il li plest et li aggree
2576 De vrai cuer entier et loial
2577 S'en dirai en cest chant royal
2578 Merci amour de la douce doleur
2579 Que me moustre au cuer
2580 Me fait sentir
2581 Pour la plus bele
2582 Et toute la meillour
2583 Qu'en puisse el mont
2584 Ne amer ne sentir
2585 Ne ja deseruir ne porroie envers
2586 Vous les auantages
2587 Que me faites venir
2588 En tant sans plus
2589 Que je l'aing et desir
2590 Je tieng l'espoir le deduit
2591 et l'amour.
2592 A biau deduit qui si scet maintenir
2593 Tout soit ainsi c'on ne puist
2594 Par nul tour
2595 Ja a l'amour de sa vie avenir
2596 Car le bien qui en vient font corrous
2597 D'esperis.
2598 Aing ces maux lessier despire
2599 Et le iouuent en joie maintenir je doi.
2600 Dame gente de corps delitable a vëoir
2601 Resplendissant de naturel coulour
2602 Entour vairs yex rians aler
2603 Trouuer je doi bien fremir et
2604 Couchier au dessous
2605 Quant en lieu si precious
2606 M'osai d'amer enhardir
2607 Mais force d'amor m'i fist encheir
2608 Si vous prie la merci par doucour
2609 Franche dame car ne m'en puis tenir
2610 Or le comper et si n'ai pas vigor
2611 Que devers vous me sache descouurir
2612 Miex me vient a tapir
2613 Car n'est paire de vous
2614 Bien sai ja n'avrai rescous
2615 Pour tant y porrai morir
2616 Se vous pitié n'en lessiez convenir
2617 Dame merci vous pri
2618 S'onques nul jour
2619 Sont gentilz cuers ot merci de martyr
2620 Non pas pour ce qu'aye
2621 Annui ne freour
2622 Ne desespoir por ces maus soustenir
2623 Car si grant plaisir
2624 Preng des doulz maulz
2625 Sans enour
2626 Con plus sent plus sui joiaus
2627 Ne je n'en veil point guerir
2628 Car mon espoir
2629 Vault d'autrui le ioir
2630 Dame a qui je me recommande
2631 Aidiez moi qui merci demande
2632 Et m'aiez pour recommande
2633 Qui aing de bon cuer et de fin
2634 En ceste oeuvre veil metre fin
2635 Pour ce pri merci au finer
2636 Dont je ne poy onques finer
2637 Que je veil que ceste oeuvre fine
2638 Merci priant a dame fine
2639 Et por ce que nature humaine
2640 Pooit enuis tant y metre paine
2641 Et soit du plus sage de terre
2642 Plenté parler que elle n'erre
2643 Et je sui simples et poi sages
2644 Et ce n'est mie mes usages
2645 De si grant chose en rime mettre
2646 Comme j'ai icy mis en lettre
2647 Prie trestous ceulz qui l'orront
2648 Et qui amender y savront
2649 Au corrigier il y a point
Folio 171r
2650 Por Dieu qu'il le mettent a point
2651 Sans moy remordre par envie
2652 Si me feront grant cortoisie
2653 Et m'aient por ce escuse
2654 Que je n'ay pas moult ce use
2655 Mais bone amor m'i fist embatre
2656 Por moi solacier et esbatre
2657 Et si la me fist por ce faire
2658 Que a ma dame peüst plaire
2659 S'ai tant dit par dis et par fais
2660 Qu'aussi que le jor s'est parfais
2661 Quant il est venus acomplie
2662 Que c'est oevre toute acomplie
2663 Quant est a rimer et d'escrire
2664 Et de tout mon estat descrire
2665 Dusques or ay mon non couvert
2666 Si que je ne l'ai descouvert
2667 A nul vivant nis a ma dame
2668 Que Diex gart en corps et en ame
2669 Car amors ne la voloit mie
2670 Tant que ceste oevre fust bastie
2671 Et amors est chose si digne
2672 Q[ue] ne doit par dit ne par signe
2673 Faire chose qu'ele deffende
2674 Trop y averoit grant amende
2675 Or est ceste oevre en rime mise
2676 Si est poins que je le deiuse
2677 Ce qu'amors m'a fait tant celer
2678 Et por ce le veil reveler
2679 Mon non et mon seurnon cele
2680 Moustre digne amor li cela
2681 Or le voie honneur dame maine
2682 Por s'onneur au moustrer me painne
2683 J'ai dit qu'amors li a cele
2684 Mon non que j'ai puis reuele
2685 Et mon seurnon qui pas ne ment
2686 Por ce se j'ai dit plainnement
2687 Digne amor li cela ce fait
2688 Car cil fait bien qui faire fait
2689 Qui mon seurnon savoir voudra
2690 Mais qu'il ne gart ne ca ne la
2691 Fors que digne amour li cela
2692 Mais qui les lettres dessambla
2693 Et puis aprés les assambla
2694 Car se bien les scet a point mettre
2695 Plus ne mains n'i trouuera lettre
2696 Et qui bien a mon dit somme
2697 J'ai de mon non .iii. fois nomme
2698 Et de mon seurnon la mistere
2699 Cy gfault le dit de la pa[n]there